Washington, January 13 (Agencies): US Tir, Barack Obama-i tatembangba ‘State of the Union’ onük tanü Bodbar nü Congress yimsüsürtem rong nung jembiogo.
“Afghanistan aser Pakistan na densema, alima tesem balala nung tensa tendanga aruba sülen al Qaeda aser Islamic State (IS) kiralongrartemi tarutsü mapang nung US nem lendong tulu bener arutsütsü akok ta osang bushitetogo,” ta Tir Obama-i tanü sangoktsü.
“Al Qaeda aser IS napronglai asen US nem lendong bener arutsütsü akok kechiyong tanü putu nung kiralongrar nisung ishikati lendong tulu atalokdakja alima tesem balala nung tensa kanga mejungi kümdaktsüba osang aser kuli tejangja bushiteta lir,” ta pai ashi.
“Asen US sorkari al Qaeda aser IS telok na meshimeshia samatsütsü merangtsüla. Ano, IS telokji meshimeshia samatsü nunga alima tesem balala nung taruba küm 10 dak tema tensa mejungi alitsü. Middle East, Aghanistan, Pakistan, Central America, Africa aser Asia nunger densemba tesem aika nung kiralongrar tesep tenteta parnoki alima tesem balala nung lendong tsüdong atalokdaktsür,” ta pai shisem.
Al Qaeda aser IS teloktemi internet amshia nüburtem shisatsü menenja parnok tangatetba melenshitsütsü tenzüka lir ta Obama-i 8 buba State of the Union onük jembidang metetdaktsü.
Paisa ashiba agi, US-i alima linük 60 dak tema den külemi lokteper IS telok indang totzü, tongpang raratsütsü terenemshitsü agidak, par tesep aser tongpang nung amshitsü osettsüset poksaja par telok samatsütsü maparen küm 1 tejaklen nungi tenzüka inyaker.
“IS telok meshimeshia samatsütsü tangtetba lira, Congress-i mitkar tashi amshia IS anema raratsü temelaba agütsütsüla,” ta Obama-i ajungshia ashi.
“Kiralongrartemi bener arutsüba khuret ajunga bentettsütsü asoshi alimai US teyari nungdaktsü aser asenoki o jembiba agi masü mapa agi inyaka sayua tapet telangzüba agütsütsü nungdaka kümogo,” ta paisa shisem.
You must be logged in to post a comment Login