Tir Pranab-i ‘100 Million for 100 Million’ campaign tenzüktsü

December 11, 2016 nü New Delhi, Rashtrapati Bhavan nung  Tir, Pranab Mukherjee-i “100 Million for 100 Million” Campaign tenzüktsüba noksa nung angur. (New Delhi, December 11, 2016).

New Delhi, December 11 (Agencies): Deobarnü New Delhi, Rashtrapati Bhavan nung ‘Laureates and Leaders for Children Summit’ nung Tir, Pranab Mukherjee-i “100 Million for 100 Million” campaign tenzüktsüogo; iba mapatong ya ajanga alima nung tanur million aika taküm jenjang tajungba kümdaktsütsü asoshi inyaktsü.
Nobel prize angur, Kailash Satyarthi-i shisatetba campaign ya Mukherjee-i tenzüktsü; iba sentong nung Tibet yimsü lenir, Dalai Lama, Nobel prize angur- Tawakkol Karman aser Leymah Gbowee na, taoba mapang Australia Ato kilonser, Julia Gillard aser Panama Tir kinüngtsü, Lorena Castillo nungera liasü.
Iba Summit nung jembidang Pranab-i, “Alima nung science & technology, rongsenkettsüng terenlok aser nisungi inyaktetba lenla ajak nung temelenshi lia renlokaka tang tashi tanur million 100 dak tema school-i maor aser tanurtemi parnok temeten mangur, iba den külemi lenmang balala ajanga parnok anema inyaker,” ta metetdaktsü.
“Asen chirtem kümzüka melitetra aser temelenshi adokdaktsürtem akümtsü atema parnok nem maongka magütsüra terenlok makatsü ta meimchirtemi tekaraba nung ratettsüla,” ta Pranab-isa ashi.
Iba campaign atema tenüngsang agüja pai, iba mapatong ya ajanga alima nung tanur million aika ajangzüktsü imlar, ta ashi.
“Lanur aser tanur million 100 atema tang alimai achaayangba mapa ya mapang talangka meinyaki aliba temelenshi mapa ka tenzükerba lir. Alima nung lanur nütsüng timtiba aliba linük, India nungi iba campaign tenzükba ya tapet,” ta paisa ashi.
Iba campaign nükjidong ya lanur million 100 ayongdena parnok indang temeten balala metetdaktsütsü aser tanur merirjang aika dang kasa temetentem metetdaktsütsü atema lir.
Kasa summit nung jembidang Power Union Minister, Piyush Goyal-ia, iba lima ya tanurtem atema tesem tajungba ka akümtsü atema alima lenirtemi longjemer inyaktsüla, ta ashi.
Minister-isa, “Asen mapang nung tanurtem atema temelenshi kadaktsütsü asoshi asenoki longjemer inyakdi. Tanurtem atema asenoki melongjemtetra, asenoki kecha atema-a melongjemtettsü,” ta ashi.
Satyarthi-i, “Küm pongu campaign ajanga tanur million 100 dang tia tamajung nung aliba tanur jenti atema jembitsütsü aser inyaktsütsü atema ajungshitsü, aser ibaji ajanga tanurtem atema alima ya tesem tajungba ka akümtsü,” ta ashi.
Anogo ananü ‘Laureates and Leaders for Children Summit’ nung Nobel prize angurtem aser lenirtem parnoki nisung 25 shi denogo.
Kasa senden nung Monaco Princess Charlene, Jordan Prince Ali Bin Al Hussein aser Netherlands Princess Laurentien nunger den Nobel prize angur aser taoba Timor-Leste Tir Jose Ramos-Horta nungeria shilem agi.