Tir Pranab-i Air Force Unit ana nem Presidents Standards agütsü

Ambala, November 10 (Agencies): Brihostibarnü Air Force Station, Ambala (Haryana) nung India Tir aser Supreme Commander of Indian Armed Forces, Pranab Mukherjee-i Indian Air Force (IAF) units ana- 501 Signal Unit aser 30 Squadron of Indian Air Force nem Presidents Standards agütsüogo.
501 Signal Unit station commander, Group Captain Vineet Jindal aser 30 Squadron nung Commanding Officer, Wing Commander Abhay Arun Phasnsalkar nati President’s Standard Tir ket nungi agizük.
Air Force Unit mesüra Squadron-i linük nung rara mapang aser yimjung mapang junga inyaktetba atema agütsüba tematiba award ji President’s Colours lir.
Iba sentong nung jembidang Mukherjee-i iba akhümket sempet anguba atema units anaprong nem tenüngsang agütsüba den külemi parnok dang maneni linük tajungtiba nung tenzüktsü ajungshi.
Tanü iba sentong nung IAF tongti, Air Chief Marshal Arup Raha, Air Marshal SB Deo, Air Officer Commanding in chief (AOC-in-C), western air command, Haryana chief minister Manohar Lal Khattar, Haryana Angh, Kaptan Singh Solanki nunger den defence nung tongti ketdangsertem aser sorkar ketdangsertema aika liasü.
30 Squadron ya 1969 küm November 1 nü tenteta liasü aser tang iba unit ya South Western Air Command, IAF kübok Wing Commander, A A Phansalkar tetuyuba nung inyaker. Ano 501 Signals Unit nem anüdoklen arrtsülen Punjab Sector kümzüktsü mapa lemzükja lir. Iba unit ya Western Air Command kübok Group Captain Vineet Jindal tetuyuba nung. Iba unit ya 1966 küm tenteta liasü.