Tir Pranab-i ayong benjung ‘Namami Brahmaputra’ lapoktsü

Guwahati, March 31, 2017: Hokolbarnü Guwahati nung India nung ayong benjung tulutiba ‘Namami Brahmaputra ‘ lapoktsüba sentong nung Assam Chief Minister, Sarbananda Sanowal-i sobaliba yimya nung Tir, Pranab Mukharjee agizükba noksa nung angur. 

Guwahati (Assam), March 31 (Agencies): Tanü Guwahati nung linük Tir, Pranab Mukherjee-i India nung ayong benjung tulutiba, ‘Namami Brahmaputra’ lapoktsü; iba benjung ya Brahmaputra ayong den sendaktepa aliba shishilembaba, tourism aser sobaliba ajungkettsütsü nükjidong nung ayonga amunger.
Ayongtemji loktiliba arangshitsürtem lir, ta shia Tir Pranab Mukherjee-i, akhidang loktiliba arangshiba – Egyptian, Babylonian, Indus Valley civilisation mesüra Aryan civilization ji ayongkümtem nung liasü, ta metetdaktsü.
“North East sobaliba, rongsenkettsüng aser nüngdakba arangshibatemji Brahmputra ayongküm nungi lir,” ta Tiri metetdaktsü.
Iba ama benjungmung ajanga tourism aser rongsenkettsüng ajungkettsütsü imlar, ta paisa ashi.
Pai ashiba agi, nütsüng billion 1.3 aliba linük atema tashi tulutibaji- loktiliba temeyoktep balala jenti liaka telongjem nung litetba ya lir.
Anogo pongunü benjung ya “India nung ayong benjung tulutiba lir’ ta züngshir, aser iba benjungmung ya state kübok district 21 prongla nung ayonga amunger.
Iba benjung lapokba sentong nung Bhutan Ato kilonser, Tshering Tobgay aser Assam Angh nata dena liasü.
Bhutan Ato kilonser, Tobgay-ia, Assam aser Bhutan linük na arrtsü lemsateper aser ajak sademsadema liteter; Assam renlokba ajanga tesem, talisa Bangladesh aser Bhutan na ajangzüktsü, ta ashi.
State Chief Minister, Sarbananda Sonowal-i, iba benjung nung Ato kilonser, Narendra Modi temoatsü dena lir, ta ashi.
Paisa, “Iba ayong ya state sobaliba aser rongsenkettsüng den kanga sendaktepa lir aser iba benjung ajanga Assam-a tourism map nung densemtsü,” ta ashi.
Tawa Angaraag Mahanta ‘Papon’-i mejemba ‘Namami Brahmaputra’ omen ken Hindi aser Assamese naprongla nung sayaa liasü.
Hindi ken tetenzüklen Bollywood actor, Amitabh Bachchan-i aten aser iba ken nungsa Shreya Ghoshal, Shankar Mahadevan, Kailash Kher, Sonu Nigam, Arijit Singh, Vishal Dadlani, Shekhar Ravjiani, Shaan, Harshdeep Kaur, Swanand Kirkire, Shubha Mudgal, Usha Uthup aser Zubeen Garg nungeria shilem agia tena lir.
Ano Assamese ken nungji Papon tetsü/ nüngtugu kentener, Archana Mahanta den Mridula Das, Zubeen Garg, Pulak Banerjee, Jitul Sonowal, Tarali Sarma, Namita Bhattacharya, Kalpana Patowary, Malabika Bora, Shillong Choir, Mayukh Hazarika, Rupam Bhuyan, Manjyotsna Goswami Mahanta, Nilima Khatun, Santa Uzir aser Joi Barua nungeria shilem agia tena lir.
Ano Papon aser Zubeen Garg natibo Assamese aser Hindi ken naprongla nungji shilem agia lir.