Tir Pranab-i GST Bill agizükogo

New Delhi, September 08 (Agencies): Brihostibarnü linük Tir, Pranab Mukherjee-i sorkar indang Goods & Services Tax Bill agizükogo; iba ozüng ajanga tang Centre aser state temi saru balala aika saruba ya joko linük tesem ajaklen saru ka dang akumtsü.
Tiri GST agizükba ajanga item ozüngtem mapa küma benoktsü atema maneni Centre-i iba dak sendakba ozüng asem agizüktsü. Linük nung states/Union Territory 31 nungi state 18-ibo GST agizükogo.
GST Bill ya Congress den opposition party kari anemba ajanga Rajya Sabha nung mapang talangka magizükteti aru, ajisüaka Congress-i iba bill nung ozüng kar melenshitsü akhang, aser itemji agizükba sülen taoba ita Parliament House anaprong nung agizükogo.
GST ya sangküm April ita mezüng anogo nungi mapa küma benoktsü sorkar sentong lir.
GST Council ka tentettsü aser parnoki tax rate, cess aser surcharges latettsü.
Yashi Union Finance Minister, Arun Jaitley-i, “Itemji inyaktsü atema September aser October ita lir aser November nunga mapang lir. Mapa teinyaktsü jenti lir,” ta shiogo.
Jaitley-i aniba GST Council nung züngsemtemji state tem nungi Finance Minister tem asütsü. GST ya amendment bill ka akumtsü atema state tem tesadang katibo agizüktsüla, ajioda state 17-i iba bill agizükba sülen GST bill ya President’s Secretariat dangi yoka liasü.
Iba bill ya Assam, Bihar, Jharkhand, Chhattisgarh, Himachal Pradesh, Gujarat, Madhya Pradesh, Delhi, Nagaland, Maharashtra, Haryana, Sikkim, Mizoram, Telangana, Goa, Odisha aser Rajasthan state assembly temi agizükogo. Iba dak alia tanü Andhra Pradesh assembly nunga iba bill agizükogo.