Tir Pranab-i Israel semdanga linük ana tesentaktep yanglutsü

New Delhi, October 04 (Agencies): Tan ita tatembanglen Tir Pranab Mukherjee-i Yihuda nunger linük, Israel semdangba mapang India aser Israel na tesentaktep yangluba den tzü, energy aser shisaliok nung tezüngzüktep asem agitsü imlar, ta tanü Israel ketdangser kati ajanga ashi.
Linük ana tesentaktep tajungba kümdar ta shia Israel Ambassador, Daniel Carmon-i, Mukherjee-i semdangbaji kanga tongtibang ka asütsü, aser iba mapang nung linük anapronglai tesem aisülen amaliteptsü merangtsü, ta ashi.
“Küm aika asen tesentaktepji telung nung dang liasü. Tangbo ibaji jangja jangja ladaka angur, koba ajanga linük anaprong ajungtsüsa sabang kati bener arutsür. Onok ya khenyongi balala saka lungjema lir,” ta Israel ketdangseri osangbenertem dang ashi.
Israel nunger raraba oset timtiba alizükerji India lir. Tesüiba küm ishika Israel-i India dangi raraba oset aika, missiles aser nisung mamenba tayimtsü aika yokogo, ajisüka itemji timbaka telung nungang ayu.
1992 küm India-i Israel den tesentakatep kanga junga yangluogo. India nunger Ato kilonser mesüra Tir kati-a iba linük semdanga mali.
Carmon-isa, “Defence aser aluyimbaren nung onok senteper inyaker aser tzü, energy aser shisaliok nunga senteper inyaktsü tebilemba lir,” ta ashi.
India Tir-i Israel semdangba mapang tzü, energy aser shisaliok nung tezüngzüktep asem agitsü akok, ta paisa ashi.
Linük ana tsüngda nüburtem tongtepratepa taliba alitsü kanga nüngdak ta shia Carmon-i, India aser Israel na tsüngda tayimtsü ‘direct’ senzütsüla aser temaba ketdangsertem tsüngda linük semdangteptsüla, ta ashi.
Ato kilonser Narendra Modi-i Israel semdangtsü tebilemba aliba dak sentakba nung tasüngdangba ka langzüdang pai, “Ibaji 2015 küm nungbosa mataloktsüa akok. Anogotemji ketdangsertemi lemtettsü, saka kodang pai semdangdir ibaji linük anaprong atema kanga tongtibang ka asütsü,” ta ashi.