Tir Pranab-i Jordan, Amman nung Mahatma Gandhi Street lapoktsüogo

Oct. 11, 2015 nü Jordan yimtiba, Amman nung Jordan nung India Ambassador-i ayongba sentong nung Tir, Pranab Mukherjee-i India sensotem den jembiba noksa nung angur.  

Amman, October 11 (Agencies): Deobar nü Jordan yimtiba, Amman nung India Tir Pranab Mukherjee-i lenmang ka Mahatma Gandhi nüngtem nung ajaba lapoktsüogo.
Saddzagloul Street shilem ka dang ‘Mahatma Gandhi Street’ ta ajatsü.
Iba sentong nung jembidang Amman Mayor, Aqel bel Tagi-i, iba lenmangji India lenir nüngtem nung jatsütsü shimteta liasü, kechiyong iba tesemji India nung aser iba tesem nung yimjung atema inyakba puti otsü den sentaktepa lir, ta ashi.
“Iba lenmang ya onoki shima liasü, kechiyong Chubar kibong züngsem ka, Chubar adianu aser yimjung atema lenir Saddzagloul den-a sentaktepa lir, Mahatma Gandhi-i yimjung atema inyakba mapang nung pai-a yimung atema inyaka liasü,” ta Aqel bel Tagi-i ashi.
Tir Pranab-ia iba temeim mapa atema par linük dang pelaba lemsatepogo, iba den külemi pai yangi aliba Peace Park nung olive süngdong ka temtsüogo.