Tir Pranab-i New Zealand aser Papua New Guinea semdangtsü

New Delhi, April 23 (Agencies): Taruba hopta linük Tir, Pranab Mukherjee-i Papua New Guinea (PNG) aser New Zealand linük na semdangtsü; khenyongi pai  linük ana semdangba ya tang mezüng asütsü aser iba mapang nung linük ana denji India-i tezüngzüktep aika agitsü sentong lir.
April 28 nü pai Papua New Guinea semdangba mapang shisaliok, anema alibaren, connectivity, rongsenkettsüng nung amalitep, aluyimba aser diary farming densema onük aika nung tezüngzüktep agitsü imlar.
Tanü osangbenertem den jembidang External Affairs Ministry otongdar, Vikas Swarup-i, “Tir-i khen nung linük ana semdangbaji tang mezüng asütsü,” ta ashi.
Food Processing Industries Minister, Harsimrat Kaur Badal aser MP züngsemtemi Tir Pranab meina aotsü.
Litsü aser nütsüng yongzük naprong nung ajemdaker Pacific asetkong nung Papua New Guinea ya linük tulutiba lir, aser iba linük nem ali nungi adokba rongsen jenti moaja lir.
Yaküm August ita India nung summit senden ka alidang Papua New Guinea Ato kilonser, Peter O’Neill-i India semdanga liasü.
“Anema alibaren, infrastructure terenlok, capacity building ama lenla aika nung India aser PNG (Papua New Guinea) na tsüngda amalitepa inyaktsü atema maparen tatembanglen kati arudar,” ta MEA otongdar Swarup-isa ashi.
Ano April 30 nungi tenzüka Tir Pranab-i New Zealand linük semdangtsü, aser iba dak sendakba nung India ketdangser Swarup-i, India aser New Zealand na sobaliba nung tesentaktep junga lir, ta metetddaktsü.
“Linük anapronglai aluyimba, shisaliok, skill development aser technology nung amalitepa inyaktsü atema bilemdangdar. Yangji (New Zealand) India nunger nisung  1,75,000 aliba ajanga ano  asenok tesentaktep tajungba kümdaktsür,” ta pai ashi.
2011 küm New Zealand Ato kilonser, John Key-i India semdanga liasü aser New Zealand Governor General-ibo 2008, 2009 aser 2011 kümtem nung India semdangogo.