Tir Pranab-i sepaitemi nem tenüngsang agütsür

New Delhi, January 31 (Agencies) : Yaküm September ita Army-i Line of Control adena orr kiralongrartem amakbaji sorkari kanga dang bilemdanga inyakba mapa liasü aser ozüng alema arrtsü adenba aitba inyakyim asoshi telangzüba tajung ka liasü, Tir Pranab Mukherjee-i ashi.
“Asen linük kümzüka ayutsü atema sorkari telemtetba tajung agi. Asen sepaitemi iba ama tasütait mapa inyakba atema nüma atanger aser parnok nem tenüngsang agütsür” ta tanü Parliament joint session nung Mukherjee-i ashi.
One Rank One Pension indang olen ka jembidang, Mukherjee-i ashiba agi, mapang talangka nungi defence veteran temi aginüa aruba ka sorkari mapa küma inyaktsüogo.
“Iba maparen asoshi sen crore 11,000 shi endoktsü. Shilem ana lemsar crore 6,200 den tema agütsüogo aser iba ajanga veteran lakh 19.6 shi ajangzükogo” ta paisa shisem.
Yaküm September 29 aonung Army nungi sepai 22-i Line of Control adena ai aser kiralongrartem tesep 7 tashi amak.
Tesep shia kiralongrar 30-40 shi liasü aser parnok aika kahset ta Army osang ka ajanga metetdakja liasü.
Jammu & Kashmir kübok Uri nung kiralongrartemi Army tesep ka amakba sülen iba mapa ya inyak.