Tir Pranab-i smart model village pilot project tenzüktsüogo

New Delhi, July 02 (Agencies): Honibarnü New Delhi, Rashtrapati Bhavan nung Tir, Pranab Mukherjee-i smart model village pilot project tenzüktsüogo.
Pranab-i, tesüiba küm pezü tashi pa Tir inyaka arudang tang mezüng pai Rashtrapati Bhavan nung sarpanch tem aser yimtsüng ketdangser aika den jembitsü maongka nguogo, ta metetdaktsü.
Tir estate ji smart model ka ama iba nungi ajizüka Haryana nung teshimtet yimtsüng pongu nung terenlok mapa inyaktsüji otsüsütsü mapatong ka lir ta shia Tir-i iba mapatong nung shilem agir ajak- central ministry tem, Haryana sorkar den district aser yimtsüng ketdangsertem, lokti tentettem dang pelaba den külemi tenüngsang agütsü.
“Tir mapa agizükba mapang nungi pai Rashtrapati Bhavan ya nüburtem nem lapoktsür ta jembia arur. Ajisüaka tanübo atangji Rashtrapati Bhavan ya nüburtem nem lapoktsüba ama bilemer, kechiyong yangi yimtsüng nungi teshimtet lenirtem dena lir,” ta Rashtrapati Bhavan sangdong ka ajanga ashi.
Iba mapatong ya yimtsüng pongu nung ya dang masü saka linük tesem ajak nung prokshitsü imlar ta shia Tiri, “Yimtsüngtem nungi lenirtemi dang linük nung temelenshi bener arutettsü,” ta ashi.
“Yimtsüngtem nungi telemtetba yanglurtem den senteper inyak nung dang asen terenlok nükjidong tekaraba nung tongtettsü,” ta pai ashi.
Iba pilot project kübok smart villages ponguji Haryana, Gurgaon district kübok Dhaula, Alipur, Harichandpur aser Taj Nagar den Mewat district kübok Rojka Meo yimtsüngtem lir.
May 19, 2016 nü Rashtrapati Bhawan nung Intelligent Operations Centre (IOC) aser Mobile App ‘Monitor’ tenzüktsüba sentong nung Tiri pilot project ya sangdonga liasü.