Tir Pranab Mukherjee Jordan yimtiba Amman tongogo

New Delhi, October 10 (Agencies): Tir Pranab Mukherjee tanü Jordan yimtiba, Amman tonga ogo aser pai anogo trok West Asia linüktem semdangtsü; tanü pa Amman atongba sülen sobaliba yimya nung pa agizük, aser pai Chuba Abdullah ajurua liasü.
India lenir Pranab tayimtsü nung ghonda trok agia Amman nung aliba airport atongba sülen Al Husseinieh Palace nung agizüka liasü.
Tir Pranab aser Jordan Chuba na minute 30 shi ajuruba sülen delegation-level senden kaogo.
Chubai India lenir asoshi chiyungba sentong ka ayongzük. Tir den pa meina aortemji- Union Minister Thawar Chand Gehlot aser Congress nungi K V Thomas aser BJP nungi Meenakshi Lekhi densema MP trok liasü.
Mukherjee anogo ananü Jordan nung amungba sülen maneni pai Palestine aser Israel linük na semdangtsü. Iba linük asem mezüng semdangba Tir ji Pranab asütsü.
New Delhi nungi mapusodang Tir-i, pai linük asem semdangbaji puti otsü ka asütsü, ta shia liasü.
Tesüiba hopta ishika Israel aser Palestine linük na nung mepetmesü adokba ajanga nisung aika asüba den külemi jenti yiruogo, aser ibaji ajanga Tir-i alemli tongtibang tesemtem semdangtsü aliba sentong thiogo aser security tali agütsüogo.
Tesüiba küm 65 sülenbo India Tir kati Jordan mezüng semdangbaji Mukherjee asütsü. 1988 küm tesüiba mapang Ato kilonser Rajiv Gandhi-ia Jordan linük semdanga liasü.
Tir-i Jordan semdangba mapang linük ana tsüngda shishilembabaren nung jenjang tajungba akümtsü atema maongka bushitsü, kechiyong West Asia nung India company tem atema Jordan ya tiyongtsü tesem ka ama amshitettsü.
Mukherjee-i University of Jordan semdangtsü aser yangji tesayurtem aser kaketshirtem den jembitsü. Amman nung India sensotem atema Indian Ambassador-i ayongzükba sentong ka nunga pa tetushi tejaoker asütsü.
Tamalen Tir-i, “Onoki Jordan ya tongtibang partner ka ama züngshir. Jordan ya tesem tajung ka lir, anungji ibaji ajanga Indian company temi iba tesem (West Asia) nung aliba market nung rangloktettsü. Linük ana tsüngda tanga lenmangtem nunga amalitep akatsü asoshi inyaktsüla,” ta ashi.