Tir Pranab nem ‘Global leader award’ agütsü

New Delhi, December 17, 2015: Brihostibar nü New Delhi, Rashtrapati Bhavan nung California, United States of America nung aliba UC Berkeley-Haas School of Business-i Tir, Pranab Mukherjee-i nem ‘Outstanding Global Leader in Open Innovation’ atema Garwood Award agütsüba noksa nung angur.

New Delhi, December 17 (Agencies): Tir Pranab Mukherjee-i linük nung temaba office nungi pai achaayanga purarapitetba programme balala agiba nung junga inyaktetba atema Brihostibar nü pa nem global leader award agütsüogo.

Iba sentong nung Tir Pranab-i, linük sensotem tajungtiba nung tenzüktettsü atema sorkari ‘open innovation’ benoktsüla, ta ashi.

“Open innovation ji tarutsü atema lenmang ka lir, kechiyong iba ya ajanga tentet ka nung lenla ajungalen nungi shisatsü agiteter. Open innovation ya sensotem tenzüktsü asoshi khuret agüja aliba sorkar atema tongitbangtiba lir,” ta pai ashi.

Tanü New Delhi Rashtrapati Bhavan nung California, United States of America nung aliba UC Berkeley-Haas School of Business-i pa nem ‘Outstanding Global Leader in Open Innovation’ atema Garwood Award agütsüba sülen pai item o jembia liasü.

Mukherjee-i iba award ya linük nüburtem, Rashtrapati Bhavan nung par staff aser külem tenzükertem nem agütsür, ta ashi.

Mukherjee-i tesüiba küm asem ser tesadang shi Tir inyakba mapang pai lanurtemi purapitettsü atema ajungmesotsü asoshi sentong aika benoka inyakogo aser iba dak sentakba nung taküm küm tetenzüklena President’s Estate-i ayongzüka tang mezüng ‘Festival of Innovation’ kaogo.

Tir Pranab-i linük nung kaket reju balala aika nung jembidang tasen purapitetta inyaktsü aser Research & Development nung temelung agütsütsü atema ajungshia aruogo.

Iba sentong nung Mukherjee-i, purapitetbaji ainba aser terenlok atema tongtibang gari anir ka ama lir, ta ashi.