Tir Pranab Palestine linük tongogo

Ramallah (Palestine), October 12 (Agencies): Hombar nü Tir, Pranab Mukherjee Palestine yimtiba, Ramallah tongogo, iba ya tang mezüng India tongti lenir kati Palestine semdanger lir.

Tesüiba anogo ana Tir-i Jordan yimtiba, Amman semdanga liasü aser tanü pa Amman nungi Israel nung Ben-Gurion airport tashi ao aser Palestinian Authority (PA) tesem tonga liasü.

Pai Mongolbar nü nungi tenzüka anogo asemnü Israel semdangtsü.

Tawa Israel aser Palestine na tsüngda rara nung nisung aika süogo, aser iba tensaji ajanga pai Jordan nung akhi otsü aliba tesemtem mesemdangteti liasü.

Tensa majungba ajangasa Tir Pranab Ben-Gurion airport nungi Israel aser Palestine na arrtsü ladangba tesem, Bitunia checkpoint tashi oa liasü. Iba checkpoint tashi Tir aser pa meina aortem Israel nunger gari nung ao aser checkpoint nung Palestine nunger gari agi melena liasü.

Iba Checkpoint nungji Palestine education minister, Sabri Saidan-i Tir agizüka liasü.