Tir Ram Nath-i Barcelona amakba aitsür

New Delhi, August 18 (Agencies): Yashi Spain, Barcelona nung kiralongrartemi amakdang nisung 14 tepsetba aser nisung 130 dak atema yirutsüba tatalokba India Tir, Ram Nath Kovind-i aitsüogo.
Tiri King Felipe VI dang, iba ama mapang nung Spain nunger den tejashi lemsateper, ta metetdaktsü.
“Barcelona nung kiralongrartemi amakba atema ni aoksar aser jashir. India-i iba tatalokba sashia aitsür. Ni asürtem atema mangyimer aser yirua alirtem tekaraba nung aneptsü sarasademtsür,” ta Tiri ashi, ta tanü Rashtrapati Bhavan sangdong ka nung metetdaktsü.
Kovind-isa, tanü kiralongra ya meimchir atema amokmeren tulutiba lir, ta ashi.
“Shisa tamajung adenertemi yimjung meimba nüburtem samatsüner. Alima linüktemi longjemer inyaktsüka. Kiralongrartem tamakok ngudaktsütsü aema India-i Spain den inyaktsü,” ta paisa metetdaktsü.