Tir Sein-i Myanmar sorkar anemer den yimjung senden amener

Naypyitaw, September 09 (Agencies): Myanmar Tir, Thein Sein-i Myanmar sorkar anemer telok lenirtem den Naypyitaw yimti nung yimjung senden ka tanü Bodbar nü menogo.

Sorkar anemertem den yimjung nung alitsü tenzügzüktep takok ngua agiba ajanga taküm November ita agitsü election sentong nung Sein-i aniba Union Solidarity & Development Party (US & DP) yimtenren telok indang jenjang tajungba kümdaktsütsü lir.

Ajisüaka, Myanmar’er China arrtsülen, Kokang region nung tentetba sorkar anemertemi tan amenba yimjung senden nung shilem magiba osang jangjaogo.

“Mitkartemi yimsüsütsü tashi benoka arur külen Myanmar nung democracy yimsüsütsü yimya benshia temelenshi agibaren nung yimji yimjung alitsüji tongtipang shile ka lir kechiyong yimji yimjung tia melibo iba temelenshi tajung ya asen linüki magitettsü. Anungji, tanü senden amenba ajanga tan September ita metembangdang Myanmar ajunga nung sorkar anemer den yimjung tezüngzüktep takok ngua agitsü imlar,” ta Sein-i tanü metetdaktsü.

Tir Sein-i sorkar anemertem den yimjung tezüngzüktepji tan September ita 29 nü tatem küma zülutepa agitsü onük benokba osanga jangjaogo.

Sein-i taküm agitsü ayongba general election nung candidate ka ama toktepa shilem agitsü sentong renema mali saka parliament nung mezüngsemba lenir nem Myanmar Tir menden bendaktsütsü asoshi par linük ozüngi yimsüsürtem nem tashi agüja aliba yong Sein-i Myanmar Tir tanaben akümtsü jenjanga angutsü akok.

Ajisüaka, sorkar anemertemi junga meshisadangi Myanmar sorkar den yimjung tezünzüktep magitsü asoshi Myanmar opposition lenila, Aung San Suu Kyi-i taoba hopta metetdaktsüogo.

Sorkar anemba telok ajunga jaokba sülen ang sorkar anemertemi sorkar den yimjung tezüngzüktep tajung agitsü asoshi lai ayonga lir.

Ano külen, Suu Kyi-i lar National League for Democracy (NLD) yimtenren telok asoshi election nüboyimba sentong tenzüka asüng, Brehostibar nü Kayah State semdanga nüburtem den ajuruteptsü sentong renema lir.

Suu Kyi-i nüburtem den ajurutepa anaben tashi onük jembiba den külemi, Kayah State tan Honibar nü tashi semdanga senzütsü sentong renemba osanga jangjaogo.