Tir yimsüsübaji khen atema dang, assembly asentenshitsü: Naidu

New Delhi, April 22 (Agencies): Centre-i Uttarakhand nung Tir yimsüsüba benoka aliba yashi High Court-i agientsüba sülen anogo ka lir tanü Union minister, M Venkaiah Naidu-i, “Tir yimsüsüba benokbaji khenpiga atema dang lir; Angh-i agütsüba osang nung ajemdaker assembly asentenshitsü,” ta metetdaktsü.

Pai ashiba agi, Uttarakhand nung Temzüng raksabaji tejangja, kechiyong Assembly nung Appropriation Bill magizük.

“356 (Linük Temzüng Arrla) agizüktsüba dak alaka tanga lenmang maliasü ta onoki bilemer. Assembly ji manentsü. Temzüng raksaba ajanga Tir yimsüsüba benoktsüsa akum, aser mapang mashika nung ano Assembly asentenshitsü akok,” ta Union minister-i ashi.

“Ibaji Angh-i agütsüba osang dak keta lir, iba den külemi yangi tensa ka adoka lir. Onoki teti agia ozüng akhümtsübur. Onoki Temzüng akhümtsübur,” ta Union Parliamentary Affairs Minister, Naidu-i ashi.

Centre-i state nung Tir yimsüsüba benoka aliba Uttarakhand High Court-i agienja Harish Rawat-i aniba Congress sorkar asentenshija pa dang April 29 nü assembly nung par züngsemtem tashi sayuang ta tuyuogo.

Mangatettep adoka Uttarakhand state assembly nung Speaker-i Appropriation Bill agizükogo ta sangdongba sülen taoba ita Cabinet Committee on Parliamentary Affairs senden ka amendang iba state nung Tir yimsüsüba benoktsü lemteta liasü.