Tir Yimyim adok 343 30th Sept. 2015 ABAM-i Nokdanger ta asüba nung tashishitsü tebilemdangtsü lir

~  T. Nukshi, Tuli.

ABAM Sanen Luden 29th Sept. 2015 nung ajungben mensem nung lemtetba sangdongba ama, asenok joko Khrista osang tajung yimsü agizüker küm 150 jungnüa arur. Aji oda süaka asen Ao kin sobaliba meraket mesamai tanü tashi amshia arur. Akhidang Otsüla Oboula nunger süng, lung külemba mapang item tsüngrem tem tenüng nung azüngashia yimten yimli shitak ochishia inyaktsü nangzüktepba meraketa aruba ama tanüa asen putu nung asenoki amangba Tsüngrem dang nungi yimsüsüri anir tashi, temoatsü meshia ochi nung yimten yimli bener yimsüsüa aotsü azüngashia libalirotepa arur. Aji oda, yimtak yimkong nung kija aser telok balala tsüngta tzü, ali kimong lumong raktepa mangatettep adokdang, mesüra tanga ken-o kar nung obendang bushidang meimchir kecha shisatsü agi tsüpendang obendang magütsütettsüsa ajurur. Iba ama tensa tia ajurudang yimsüsüri aseni amangba Tsüngrem matsüngdang azüngashiteptsü aser anempongteptsü sangdongba inyaka aji oda tiari kechi koda sayur yangji obendang agüja inyaka benshitepba tanü tashi arur. Arr raktepertem pa nem arr-long azüngdaktsü aser azüngashitepdaktsür. Tejen putu nungi kasa tanü tashi iba yimsüyimpong benshia inyakteper.
Küm 150 jungnüa Khrista yimsü agizükaka item sobaliba tajung asenok ajaki shitak ta amanga tanü tashi merükteta benshia arur. Saka tang ang ABAM-i kechiba iba inyakyim nokdangtsü atemteter, iba inyakyim nung tanü balaka ABAM kechi tangu teyang ali ta süngmanger. Tanü ama yim o yim kar tsüngda ibala keno mapa atalokdangang jembi ta temulungi tasüngdangba aika arur. Nüngdak süra akhi telemen mapang kecha keno ataloka maliba mapang jembia lemtet agi nungbo ajibo azü azür timi lemtet asütsü. Anungji iba ama ken o yabo ABAM central council meeting mapang lemtet nungang tim süla ta bilemer. Azüngashia anempongba tsütsü bilemdangra ABAM kübok Arogo temi kipa kiyimtsü asoshi aniasüng kulizüng aser Arogoi ita anogo atakteta kiyimba anogo madong tashi anemponga asüngteta alitsü azüngashia tesayuba agütsür, aser iba ama anempong mapang aibelener nem Arogoi kiyimba kulizüng agütsütsü memelar, aji Arogoi par teinyaktsü tim inyaker asünung idakji yimten yimsüsür ken o aser mapa kecha mali. Aji oda yimten tsütsü par teinyaktsü sobaliba nung tsüzüng ozüng talangtet amenteta yur par-a par teinyaktsü shitak inyaka arur aser yangji Arogoi kecha ashitsü madoker. Süra yim süngkümshi ka nung par putu yimsüsür item sobaliba yimsü yimpong inyakdang ABAM-i aji nokdangtettsü asü koda ta bilemer. Tejen yimsü yimpong dangi meyiptsü ABAM-i nokdanger, süra ABAM-i ano item ama tejen yimsüsür atemaka kechi koda ashitsü.
1. Yim o yim na inki shitepba anemtepba
2. Süng, lung agi aser shiruru-i tepsetba, sosüta asüba agi ibala mesükba arubatem menen agi asüba ta züngshir aser kiojen, oset tsüset menendokba magir. Tasümanga yimdaki bener marudaktsür.
3. Tasür sür lepko mong amongba
4. Moatsü, Tsüngremmong mongteper aser Pastortemi anir item mongtem mongtsü nung shilem agia adener.
Iba ya kü tangatetba yari lemsateper asünung metongshiteptsü lira metongshitep nung kanga ajungtsü.