Tir Yimyim-i Dimapur nung face masks lemogo

December 9, 2020 anepdang Press Point, Tir Yimyim office Supermarket kima nung DPRO Dimapur Lolano Patton-i face masks alemba maparen tenzüktsüdang agiba noksa angur. (Dimapur, December 9)

Dimapur, December 9 (TYO): Bodbarnü Tir Yimyim-i Dimapur kübok tesem balala nung face masks lema agütsüogo.
Bodbarnep Press Point, Tir Yimyim office, Super Market, Dimapur nung sentong tatsüka agiba sülen District Public Relations Officer Dimapur, Lolano Patton-i face mask alemba maparen tenzükja liasü.
Sentong nung Tir Yimyim yimozülur, K Temjen Jamir-i okila jembidang “iba mapa ya Tir Yimyim azüngertem aser meimertemi tenla agütsüba ajanga inyaker” ta tenla agütsür aser teyaritepertem ajak dang pelaba metetdaktsu.
“Tanü asen lima tonga aliba coronavirus anema raraba nung face mask ya kanga tongtipang lir. Anungji, yimdong nung mask meinoki senzürtem aser ano disposable masks amshir nem washable cotton masks agütsütsü” ta paisa ashi.
Shitoka amshitetba cotton masks ya Dimapur nung matamabensartemi arrba lir aser parnokia iba mapa nung shilem tulu agiogo, ta K Temjen-isa ashi.
Iba sentong nung DPRO Dimapur, Lolano Patton-i o tatsüka jembidang Tir Yimyim yimozüluri anir teyaritepertem ajak nem tenüngsang agütsü.
“Meimchir meima iba mapa tajung inyaker aser iba ajanga nübortem dang COVID-19 osang prokshir. Iba ya press pur ajak nüma atangba mapa ka lir,” ta laisa ashi.
“COVID-19 indang vaccine tajung ka mengutet tashi iba wara alitsü. Anungji tebilemtsü khuret abenba sensotem ama asenoki nübortem dang COVID-19 nungi jenbua alitsü atema teinyaktsütem inyaktsü teti nenshia metetdaktsüdi” ta Lolano Patton-isa ayongzük.
Iba sentong asoshi DABA Youth Director, Jongshimanen Jamir-i temoatsü meshia sarasadem.
Tanü Act of Kindness, Dimapur Ao Baptist Church (DABA) Christian Education Ministry aser Dimapur Press Club (DPC) nungi teyariteper nisung 30 shi kati Dimapur kübok Super market, GS Road, MP Road, Church road aser New market nung mask lema agütsü.