Tir Yimyim March 27 adok nung kü tangatetba yari lemsatepba nung Tiawati Jamir-i züluba langzütsüsa angatetba kar lemsateper.

–  T.Nukshi Yaden

Adianu Tiawati Jamir ya nibo meteta malia saka paibo ni ya kanga junga meteta aliba nisung ka ama angateter. Kü tangatetba yari lemsatep asünung temetongshitsü kar agütsü asünungbo kanga pela-a agizükla, saka onük aika nung taitsüba yimya agi zülu nung kar langzütsüsa akümer.
Nagaland State ngur 1964 nungi election agia tanü tashi arur. Anungji, Representation of People Act, 1951 ji aliyong asenok dang ajungba apia mapang shia election yimya tapu balala nung melenshia 2018 tashi agia aruogo aji asenok ajaki ajangshiogo.
Ni koba lemsatepogo iba ya jaka ka dak rangloker züluba masü saka Naga lima ajak tia asadanga lemsatepogo.
1. Clean election yimyim takok angutsü asoshi asenok ajak melenshitsü aika liasü saka asenoki aji ta melitet ta ni shiogo. Kechiba tenzük ta ni masüngdang. Ano shirnokisa yimden anema court nung case agüja temeten bushia inyakogo aji nonga ta mashir, saka nenok tebilemba aser tangatetba tajungji yimsüsür aser senso den lemsateptsü sapang tajung magitetba ajanga ajak tsütsü takoksa ajurogo aser mepetmesüang tali ajurogo ta bilemer.
2. IEF President ya tetsür asüa ta Tiawati Jamir-i kanga jangjatsüogo. Pai züluba ya la aser lai ta amshia lir. IEF President kidang yi aika police-i apuba ni shiogo, saka ajemba aser ayokba ni memetet. Tuli nung IEF tetsür shinga police-i mapu ni police station nung asüngdangogo. Kü asangwa meyiba reprangdangtsü ashibaji, ni asangwa asüdang koma liasü aji kü asangwa taküm, saka dang ni joko tain aküm nung ni tain ama alir. Ni tatishitsü kar amshia züluba nung ni tatalokba zülu ama nai angatet südi. Prangpong aser bomb mamshi ama nai ashir süra 24th Feb’ 2018 anogo yim ka nung party ana tsüngta prangpong aser bomb amshia katep tialong nung par yimer laishirtemi nübur dangi sarasadem nung yariang ta WhatsApp ajanga video dena prokshiogo kar teyari ajanga nai aji reprangdangang.
3. ULB election ya-a Election Commission of India shilem ka saka asenoki songtem, yamaji taküm General election ya magili ta pangjem saka party kar ajanga raksa. Article 371 (A) nung tashi mangarbo senso nungi jendoktsübo shia mali saka ULB election mechi Ao Senden nungi jendokba ama, tan General election nunga karbo pei senso nungi jendok, karbo pei taso li nung tetsüng majemoktsü züngtsüogo. Na-a iba nung densem asü koda?
4. Putu menden indang koba shiogo ya pei yim aser lika indang ta angateti. Putuji mejungra melentsü akok saka ano putu katisa melentsü, anungji par yim asoshibo putu mendenjisa tematiba asütsü ta nibo angateter.
5. Lai tsütsü kechi ni amshia züluogo aji nia kü tongmelang tangatetba. Ni laishir masü saka ni züngshiba tensa den apet südi ta sür züluogo. Aji oda nai kechi angatet aji na-a ne tangatetba sülaba.
Asenok ali meimchir-i tapu meyinaka asa meyangaka asen sentongji Tsüngremi molungba mesüra amajok akümtsü. Aji oda Tsüngremi yimsüsüba mendenji pai mulunger nem agütsür ta ashi ama. Sen aser prangpong aser meromero shisatsü agi kodanga iba menden malangzüktettsü. Tsüngremi shir mulung Pai agütsüogo ta angajemer lidi.