Tir Yimyim osangbener-i Christian Literature Ministry inyaker Mr. I . Kumzuk jamir den sensaksemba (interview)

Wapong I. Kümzük Jamir (IKJ), Asangma yim nungi lir. Pa B.Th aser B.D Clark Theological College (SERAMPORE) nung azüng aser tang Kohima nung lia, Christian Literature Ministry mapa inyaker. Pai kanga dang meranga Naga nunger kin ajak asoshi Literature ajanga Tsüngrem temeim tali meteta alima tejakleni odaktsütsü asoshi tani tebelem jenti arema, Nagaland nung District, Town aser yimtsüng tashi oa tongteta, kipokkisema kaket balala aser gospel CD tajungtem den nüburtem dangi Tsüngrem osang tajung bener jajar. Ashiko Naga kin rongnung tani tebelem jenti liaka, ajakji mesasai timtem arema, item amala mapa inyaker aikabo malitsü südi. Tanü pa ama mazüngi meranga inyakba taküm ka den sensaksemba ajanga tazüngertem temoatsü angutsü imlar :
TYY : Temeim adianu, na teti mazüngi senzüa angur, Anungji na ya kechi mapa inyaka jajar?
IKJ : Ni Christian Literature Ministry inyaka jajar.
TYY : Nai Christian Literature Ministry indang tatsü agi ashitsü na?
IKJ : Christian Literature Ministry tetezü Oshioben (Literature) ajanga Tsüngrem o ki telong tonga bener air, iba dang Christian Literature reach home Ministry/home delivery Ministry ta ajar.
TYY : Christian Literature Ministry ya kodang tenzük aser kechiba iba ministry ya inyaktsüsa aküm?
IKJ : Iba Christian Literature Ministry ya 2008 küm tenzüker inyaka arur. Ni tanga ministry nung inyaka arudang, nüburtem jenti tanela nung aser shisatsü nung tzüraa alibatemji Literature ajanga Tsungrem o agi tzüratemdaktsütsü mechi ibai tenzük. Talisa tawa tanü asenoki anogo shia osang kaket balala adokba ajanga, yakta dang osangtsüsangi alima asünger. Aser nüburtemi Laishiba, Ken kaket, CD aser Kaket tasen tasentem sayaba osang kaket balala ajanga angur saka parnok ket metongteter, aser dokani talia mojunger, ano züngnüyonga ki tashi bener arutsürtem-a mali. Item nungdaka alipaburtem, iba Christian Literature Ministry ajanga yaritettsü ta bilemer tejangraba tulu nung ibai tenzük. Kechiaser shisatsü tasen ngudaktsüba ajanga nübur libaliro melenshir aser alima tasen ka yangerteter ta nai metet. Aji oda, tanga ministry balala nung inyaktsü aika liaka, iba ministry ya-ang kanga tongtibang ta angateta full time ministry ka küma inyaka arudagi.
TYY : Nai kakettemji kong nungisa bendena aser kechi nungsa ayoker?
IKJ : Joko ni kaket bendena ayoktsü shisa mebulur. Kechiaser Christian Literature Ministry ya nübur ajurutepdak lenjem (meeting point) ka kümogo. Kaket zülur aser CD adokertemi ni bushia bener arutsür aser nia asüngdanga aor. Aser shirnoki kaket tapu balala tasen tasen aginer, iba Christian Literature Ministry bushia arur. Tanabuba nung kakettemji tawa tanübo weekly bazaar ya town ajak nung lapoka lir, item bazartem nung nüburtemi arua kakettemji saputepa alir. Aser mapang mapang kakettemji bener kipok sema jajar. Ibajitang masü occasion balala aliba mapang, tayongertemi (Organizer) pelaseta jaoker aser nüburtemi pelatepa aliteper.
TYY : Nai kaket yoka jajaba mapang shir kini timba alir?
IKJ : Tang tashibo Ao kini timba alir. Aji agi asen Aorsa shisatsü nung tabensaba aser taremzükba akümer ta nibo bilemer.
TYY : Nai kipok ki sema aodang aser tesem balala nung jajadang nüburtemi koma agizüker?
IKJ : Ni kipok ki sema aodang nüburtemi pelaba kaji, parnoki paper nung kaket aser CD tasen sayabato bena lir asü mali (?) ta asüngdanger. Ano nai yakta ki tashi bener arutsüba atema kanga pelar ta ashir. Ano karibo phone ajanga ozü kidangi tama bener arujang taa ashir. Ibaji dang masü aikati ni kodang arutsü ta yongyaa atar. Tanü putu nung sen peria liaka Bookstalli oa alitsü temela masü. Kechiaser nübu indokbaji doktsür, kaket jenjang dang nungi para nung sen timba indoktsüsa akümer ta asenoki meteta lir.
TYY : Kaket azüngba ajanga temoatsü aser tajangzük anguba karibo shia ali asü?
IKJ : Ao kin rongnunga aika asoshi kaket azüngba ya chiyungtsü tasen ka chibaa akümba ama kumogo ta nibo bilemer. Kechiaser kipok sema kaket ayokdang, karibo kaket ya mezüngnerako saka na tonga aruba yong alidi ta ashir. Aser parnoki kaketji zünger külen, temoatsü aser tajangzük anguba indang shioker. Iba sülenjibo kaket aser CD tasentemji maneni kidangi bener arung ta phone ajanga ashir. Ano karibo kiyonger/kidanger ket nungi kakettemji meshia zünger kulen, pa arudang ozü kidangia bener arujang ta shiang ta shiokbatema ajuruogo.
TYY : Nai-a asen nüburtem dang teshinüba kar ali asü?
IKJ : Iba ministry inyakba ajanga nübur aikati ni meteta kümogo. Aser aikati ni ajurudang, kü yangku tulu nungji ano kaket tasen tasen karbo alitsü imlaa lapokdaktsür. Lanu tain ta masü, saka alima nung pei pei jangraba mapa nung temulung agüja inyaktsü kanga tongtibang lir aser tanu yamala inyaker lanur nüngdaker. Tawa tanü lanurtem aika pei pei jangraba degree balala azünger saka governmenti mapa magütsüteter anungji temeimtsükadang tsürabur nem mesüdaktsür. Karbo timlatsü tajung samar (frustrated) tamajung lenmang nunga jajar. Apijemtsü shin O nung, ashiba ama “Kong temulungtetba lir yangji lenmang lir” yamaji pei sasa meranga inyakba nung temulung agütsütsü tanü putu nung kanga nüngdaka kümogo.
Asenoki kaket zülurtem aser CD yanglua adokertem dang kanga peladi. Kechiaser kaket küma zülutsü mesüra CD yanglua adoktsü tani tebelem jenti lir. Saka alima ka mesüra kin ka aintsü asoshi kaket züluba aser kaket azüngba den kenten menu balala reprangba ajanga dang asen lima nung temelenshi tajungji arutsü aser alima aintsü. Kaket zülurtem tezü medangi zülutsü aser kenten menü balala yanglutsü nüburtemi teti ajungshitsüla. Kaket züluri kaket tasen züluba aser kenten menü balala yangluba ajanga nüburtem libaliro melenshia alima tasen yangerloktsü. Aji kü pongmang tulutiba aser timla.
TYY : Ne temulungtetba tulu aser mangdang tulu yur mapa meranga inyakba ngua, kanga pelar. Maneni Tsüngremi ne wadang moajangma.
IKJ : Nai ni jaokba asoshi aser kü wadang asüngdangba asoshi, nia kanga pelar.