Tirap nung NSCN (K) pur ka kahset Karbi Anglong nunga mita bushir

Guwahati, March 01 (Agencies): Arunachal Pradesh kübok Tirap tesem nung mitkartem aser NSCN (K) tsüngda kahtepba mapang NSCN(K) nungi nisung ka kahset aser Assam, East Karbi Anglong district nung aliba arem nunga mitkartemi mita-bushisüngdang tenzükogo.
East Karbi Anglong district nung aliba arem min nung kiralongrartem aliba osang kar itangitertemi sangoktsüba sülen, Gajraj Corps nungi Red Horns Division ajanga iba tesem nung mita-bushiba sentong tenzükogo.
Kuki Liberation Front (KLF) telungpurtem ya East Karbi Anglong district nung aliba arem min nung atsüker nüburtem dang senotsü meshiba den sorkar ketdangser nem timtem agüja arudagi. Aser item nisungtem ya iba tesem nungi aridoktsü asoshi iba sentong ya tenzük, ta mitkartem osang ajanga ashi.
Tesüiba küm tem nunga Red Horns Division ajanga tesem balala nung telungpurtem mita-bushiba maparen nung takok anguba asoshi linük nung parnok tenüng asangba otsü angashia arudagi.
Upper Assam aser Arunachal Pradesh anüdoklen tsütsü telungpurtem kanga bulua aliba ajanga mitkartemi kanga junga tenük yoka mita reprangdagi aser mitkartemi tashi amshia telungpurtem sentong balala nungi nokdanga arudagi.
Arunachal Pradesh nung aliba Tirap district kübok Muktova tesem nung NSCN (K) pur Corporal Wahang Sumyen ya 2017, February 27 nung Assam Rifle temi kahset. Pa ket nungi pistol ka, injang, IED tesashi ka aser parnok kümzüka alitsü asoshi oset tapu balala aika ngutet.