Titan nung Methane tzünglu bilemba dang nungi tali alur

New York, October 14 (Agencies): Saturn indang ita tulutiba, Titan nung methane tzünglu bilemba tang nungi tera tali alur, aser ibaji ajanga teti azüngmeyaka kecha maliba tesem nungji tzü metsüngdaktsür.
Iba yipru ya Titan year küm ka shia khen dak tali ataloker – titan küm kaji alima küm 29 ser tesadang lir – ajisüaka iba yipru yagi Titan ma nung aliba rür kanga junga amentettsü, ta Nature Geoscience osang nung shia lir.
“Ni iba ya millennium ka nung khen ataloktsü amai bilem,” ta University of California, Los Angeles (UCLA) nung Planetary Science indang Associate Professor, Jonathan Mitchell-i ashi.
“Anungji ya kanga taoksatsüka lir,” ta UCLA indang Titan climate modelling research group nunga principal investigator, Mitchell-i ashi.
Titan tema ya alima den saku lir. Yangji aliba ayongtemji tzütu tulu aser tzüyimtem nung yimoker aser ita nung yipru aitba mepet aliba ajanga mongpu nung tzünglu bener arutsür, ta Mitchell-i shisem.
Ajisüaka Titan nung aluba tzüngluji tzü masü saka Methane lir.
“Asen lima nung methane timtiba alubaji feet ka shi aluba lir. Iba tzüngluji taküm mei mapang Hurricane Harvey ajanga Houston nung bener arutsüba liasü,” ta Mitchell-isa ashi.
Alima nung tzünglu aluba ajanga long tereprangtsü melenshia kümdaktsüba ama yangji methane tzünglu aluba ajanga moon indang ice ma tereprangtsü melenshitsür, ta UCLA nung graduate asüba shisashir aser iba bushisüngdang nung lenir, Sean Faulk-i ashi.
Alima nung, yipru tulu ajanga kechisarena jenti pongdoker aser itemji tsünglanglen aliba linüktem sünga prokshia cone-shaped linüktemtem akümer aser iba dangji ‘alluvial fans’ ta ajar.
Titan nung iba ama yipru tesashi aruba ajanga tesemtem tereprangtsü melenshitsür aser ‘alluvial fans’ tem akümer, ta iba bushisüngdang tasenba ajanga scientist temi ngutetogo.
Onoki ngutetbatem ajanga iba ama tzünglu ajanga Titan tereprangtsü melenshitsüba jangja meteter, ta UCLA nung Assistant Professor, Seulgi Moon-i ashi.
Titan indang alluvial fans tem ya Cassini spacecraft nungi radar instrument ka ajanga ngutet, Cassini ya 2004 küm tatemlen nung Saturn longa jajar.
Cassini mission ya September 2017 nung tembangogo, iba spacecraft ya lendong aser timtem kecha mataloki samatsü asoshi NASA-i Saturn ma nung lua tsüka raksatsü programme süa toktsü.
Iba ama yipru ya tenem alibalen septsü aser temokong tesem aser tenemtsüng nung takong aser talem tesemtem aliba ajanga arur, ta bushisüngdang ajanga ngutet.