Tiyazü agi nüngkhu bentetba

India nung Nagaland-i yangluba otsü kaji, school junga mezüngteti züngtor anener tanurtem rongnung Nagaland nungsa teimba asütsüsa ataloka lir. India nung makamait aser timtem balala ajuruba ajanga tanurtem school züngtor anenertemji noklang nung shilem 4.3 (4.3%) lir. Ajisüaka, Nagaland nung school züngtor anenertem jenjangji asadangra, class 1 nungi 5 tashi nung noklang nung shilem 19.4 (19.4 %), class VI nungi VIII tashi nung noklang nung shilem 17.7 (17.7 %) aser class IX aser X nungbo noklang nung shilem 35.1 tashi agi school mezüngi anenba asadangtetter. Nagaland nung tajung kaji, tesem ajak nung government school lapoka lir, anungji makamaitba agi school mezüngtet ta asütsüla masü, kechiyong government-i tazüngtsü kakettem den uniform süoshi tashi angati agütsür. Ibaji dang masü saka anogo shia anüngdang chiyongtsü agütsür. Atangji, tazünger ajak tatem tashi züngtettsü ta masü. Tanur karbo tsüraburi nüngdak ajak peritsütetyonga aser government-i nüngdak ajak angati agüja yariyonga kaket mezüngner, anungji lesson mebushinü anener. Ajisüaka, tanur noklang nung shilem 17 nungi 35 tashi school mezüngi anentsüsabajibo tebilemtsü tulu lir, anungji iba kuliji jungjunga bushitsübaji kanga nüngdak kümogo. Ashiko, tanurtem nüngdak ajunga government-i agütsüyonga school aika nung matonger asütsüa akok. Ano, school kar nungbo tesayurtem agi meperiba agi tanurtem tezüdanger school-i mao anenba asütsüa akok. Koba kuli agi südir süang, linük nung Nagaland state nungsa school tanurtem teimba züngtor anener ta asübaji School Education department asoshi dang masü mesüra state government asoshi dang masü saka Naga nunger ajak tejak metentettsüba mapa ka lir. Ashiko, Nagaland nung school tanurtem paikaji züngtor anenba osangji tiyazü asütsüa akok mesüra asenoki government nungi teyari tera talila aginü dang school tanurtem tenüng kar taila enokba agi asütsüa akok. Aikati yamaji temulung malem bilemer, kechiyong Nagaland nungbo ajak takoktsü lir. Nagaland nungbo ka department, ka department ta mali, langka teyari talila aginüdang nisung tenüng taila (tiyazü) aiyila enoker. Iba jagi school züngtor anenba nung dang masü saka nütsüng renlokba nunga Nagaland ya temaba jenjang nung lir, kechiyong census aser electoral yangluba maparen nung nütsüng renlokba jenjangji kanga sashia tua angutsü. Tanga kulia alitsüa akok, saka kuli tulutibajibo asenoki tiyazü nisung tenüng amshia school enrolment yanglur, census nung züngoker aser electoral roll nung enoker. Atangji, tangbo maparen aika nung biometric amshiba ajanga tiyazü tenüng nung teyari magitetter. Sen agütsüba maparena tangbo sen teka nung amuoktsür masü saka pei account nung dang online ajanga enoktsür. Item ama tanü putu nung yanglutetba inyakyim ajanga asenok kanga ochishia kümdaktsüdagi. Iba kasaji school nung tenüng züluokba maparen nunga ataloka aotsü. Tang Nagaland nung school züngtor anener tanurtem rongnung teimba anenbaji class 1X aser X nung anenba angur. Ashiko, ibaji shitakba school nung züluoka aliba tanurtem anener masütsüa akok saka class 1 nungi 8 tashi nung tenüng taila züluokbatem asütsüa akok, kechiyong class 9 aser 10 nungbo government nungi teyari angubatema anenadoker aser government (Board) nem tenüng talila agütsütsü makoker. Iba amai government school-tem inyakba anema temulung melemi bilemba ya shitak süra, asenok ajak Tsüngrem tsüngdang dang masü saka tangar tsüngdanga taaktsüka asütsü. Maparen ajak nung, shiba kechi inyaka lidir liaka, shitak, ochishia aser nendaka inyaktsübaji kanga tongtibang lir. Joko, asenoki ochishia aser meranga inyakba agi Nagaland nem tenüng tajung bener arutsütsü merangba dak alaka asenoki ochimashi inyakba ajanga tiyazü nung asenok alima tsüngdang nüngkhu bentettsüsa meinyakli. Shin oi ashir, kechisüdir süaka ochishia alibasa tajungtiba lir.