Tiyazü agi taküm alirtem

Tang Nagaland nung tongti yimsüsürtemi pei tazüngba jenjang meshitaki amshi ta aitsüba otsü jembidang, Nagaland nung alirtem ya tiyazü agi taküm alir aika alitsü südi ta bilemer. Atangji, yimsüsürtem jagi shitakba pei tazüngba jenjang meshitaki amshi asü mamshiar, aji mapangi ashitsü, ajisüaka Nagaland nung ya nisung aika pei tazüngba jenjang dang masü saka pei tenüng aser pei tasoba anogo tiyazü agüja yur, iba jagi kibong mesüa taküm alirtem aika alitsü. Ibaji dang masü saka sorkar department balala nung nübortem asoshi teyari arubatem nübortem nembo magütsü sür agütsür amai tezüluba nungbo sayur taküm aliba taküm aser kibong aika alitsü. Ano, alima nungbo mali ser nung lir amai tenüng tiyazü amshia ita sen, pension sen aser labor sen agizüka  chia aliba kibongtema aika alitsü amai bilemer. Aji oda, sorkar office-tem nung lenmang meyanglu ser nung yanglur ama, ki meyanglu nung yanglur ama, aluyimtsü atema tzü lenmang mali nung lir ama, ango tzübo matu ser tur ama, süngjanglijang lu mali nung lir ama aser teyaribo shinga nema kecha magütsü ser agütsür ama sayur sen agizüka chiajema taküm aliba kibongtema aika alitsü. Asenokbo election nunga nisung ishikati dang vote agütsü nung yimkongi agütsü ama, taküm alirtembo ishika dang nung electoral roll nungbo nisung aika küma yangluba tiyazü vote agütsürtemi adoktsüba yimsüsürtemi yimsü asür. Item tiyazüji Nagaland nung masemer. Item tiyazütem jagi ochi alitsübo tesem tilakata magütsür. Item tiyazütem jagi ochishia alitsü ajungshir. Tiyazüi ochishia alitsü ajungshibaji kechi asütsü ? Aji oda, tanü Nagaland nung shisabolutsü mapa tulutibaji tiyazü aika agi ochi akümtsü merangba aser tiyazürtemi ochishia alitsü ajungshiba mapatem ya asütsü. Asenok senden aika nung tongti tesemdangertemi nübortem meyong sen auyar bener oa nübortem nem  tenla agütsür aser ochishia alitsü ayongzüker. Ibaji jangratemtsüka asü ? Tejashitsüka ? Tenla sabang nung nokdaksangji tiyazü tasoba anogo amshia mapai aiba lir, saka pai ochishia alitsü sayutsüngir. Iba jagi temoatsü angutsü asü ? Tetsüng metsütsü ? Item tiyazütem dak alaka Nagaland nung tiyazü tapu kwi senzüdar asütsü (?) ta bilemdangdang, Nagaland yabo tiyazü agidang yangpanga ali amai angur. Tiyazü ya süngzü asübo, Nagaland ya tilakata mangu iba süngzü jagi naipanger süla ta bilemer. Naga nunger ochishir kin ta jembir aser Naga nunger ajak Khristan ta jembir, ajisüaka kodaser ochishir kin aser Khristan purtemi tiyazü agi ochi küma litetter ta bilemer. Asenoki tiyazü jembitsü marendaker aser maaker, iba jagi asenok dak nungi Tsüngrem  mesükba nung yangluba shisatsü agien asü (?) ta shisabolua bilemer. Asenok tiyazü tasoba anogo bener, tiyazü tazüngba jenjang amshia, tiyazü agi aaba sen agi yangluba kidang alir aser tiyazü agi aaba sen agi aliba gari nung senzür, tiyazü agi aaba auso nung chiyonger aser tiyazü agi aaba sen agi aliba yipten nung mejanger. Asenok kidang tiyazü agi aaba sen agi aliba ki osettem ki sünga bendena lir. Aji oda, tiyazü agi aaba sen agi aliba ali aser kiojen lir melima lir. Asenok akaba indang bilemdangang, kobabo asenoki ochishia aaba agi alia ali. Ibaji tilaka dang asütsüa akok, saka auyaba sen agi aliba senti rongsentem dang nungi ibajiang jenjang tuluba asütsü. Iba amaisa ao nungbo, tanü Nagaland nung alirtem tanur aser lanurtem asoshi tsürabur senmangji tiyazü, tiyazü aser tiyazü jakla aser mapatem asütsü. Tanü asenoki asen lima nung raratsüba tongpang tulutibaji tiyazü anema raratsüba ya asütsü. Ajisüaka, asenok ajak tiyazür aküm nungji, shibai tiyazü tuluba jembitetter, parjiang jangratatemba alir amato ka kümogo. Ibaji asenoki tiyazü nem koktettsüba ajanga lir. Ajisüaka, tiyazü ajanga akaba aser jangratema alibaji mopong nung ki yangluba amai lir, ibaji ken nung ponger oa adoktsü aser maka akümtsü. Joko, asenokbo tiyazü agi taküm alitsü memerangli, saka kechi shitak aser tagizüktettsü lir itemji bushia agizüka benshidi. Timtemaka ochishia alitsü angazükdi, kechiyong tatem nungbo ochi agidang akoktsü, ochi dang merentsü aser ochishirtem dang jangratema alitsü.