Tiyazü lima

Tsüraburtemi jembia aru ama, iba lima nung nisung kar tiyazü küp agir meyibanger lira, itemji Nagaland nung alir Naga nungertem ya asütsü. Iba kasaji tiyazü aser tiyazü kisüng jembia yimsüsüba lima kar danga lira, item limatem rongnunga tematiba jenjang nung aliba limajibo Nagaland asütsü. Mapang ajak nung Nagaland nung yimten teloktem rongnung kati ka aitsüteper, saka itemji jungjunga angadangra azüi azü dak asangloktsür amai dang lir. Aji oda, Nagaland nung temelenshi nüngdakba indang jembidi süra iba ama jakdaka tiyazü jembiba mulungsentsü aser jakla melenshitsü nüngdakba indang jembitsüla. Aiben asenoki asen lima nung temelenshi nüngdakba indang jembidang, Chief minister melentsüba indang jembir amai bilemer, mesüra sorkar melentsü indang jembir amai angatettsüa akok. Atangji, mejungra chief minister-a aser sorkar-a melentsü saka iba kisüng melenshiba agibo  asenoki aginüba temelenshi tajungbo mangutsü. Tang tashi nunga asenoki Nagaland nung sorkar melenba aiben ajuruogo aser chief minister-a aiben melenogo, saka temelen shia Nagaland-bo tamajungba-tamajungba aoba asenoki reprangtetter. Aji oda, sorkar melenba mesüra chief minister kisüng melenba agibo state sentsüh dang tsüloker saka nübortemi aginüba temelenshibo mangur. Tang ama Nagaland tatar senden nung opposition malia südangogo aser opposition sashisashia aliba mapanga ajuruogo, ajisüaka ajak tiyazü tiyazü dang, shingaia ochi mejembir aser shingaia pei dang taoba Nagaland asoshi bilema mali. Aji oda, tanga Nagaland nung tatar yimsüsürtem ajak tebilembaji taruba election nung kodaser takok angutsü ta bilema sen bendenerba dang lir, kechiyong nübortemi pei vote asoshi sen meshitsü ! Anungji, ajaki tiyazü jembia sen bushiba purtemji Nagaland nung yimsüsür aser nübortem aser ano tiyazü jembia sen bushiba limaji Nagaland asütsü. Iba ama tiyazü agi teküp meyir aliba purtem mang nungi tiyazü küpji shidoktsütsü aser tiyazü agi sünga aliba limaji ochi agi melentsütsüsa inyaktsübaji tanü Naga lanurtem khuret aser mapa lir. Tanü lenirtemi Naga yimten tebilemtsü indang jembibajia shitakba shisabolua talatetba katia arudaktsünüa jembir masü saka election mapang nung item telok teyari meshia amshitsü asoshi jembir. Iba jagi Naga yimten tebilemtsü latettsü asoshi  mapang papikaya agir. Atangji, Nagaland nungbo Naga yimten tebilemtsü latettsü indang jembiba ya shitakba tebilemtsü akoktsü indang jembir masü saka taruba election asoshi jembir ta angatetter. Ibayongji, joko election mapang arur asünungji yimten telok ajaki Naga yimten onük ya tangsa tejembiba asütsü. Asenoki tiyazü agi shitak küma jembibaji iba amaji jembir. Nagaland nung nübortem chiyongtsüa makayonga ojang, Naga nunger tanurtem kaketrejui maoyonga kecha masü, mozü kidang mozü süngjang kata manguyonga ojang aser lenmang nung gari mejajatettsüsa apu dena chirepyonga kecha masü, taruba election nung adokra ojang ta asüba kolok aser shisatsü agi Naga nunger tilaba nungi tuluba tashi alendakja lir. Iba ama tiyazü aser pei kija agitsü bilemba shisatsü nung jagi asenoksasa sala nung dang nüchiso angutsü aser temelenshi arutsü. Naga nunger asoshibo tebilemtsü aser teinyaktsü ajunga agi election ya dang asü ? Election atema tiyazü jembiba agi joko tangoa mesashiteti kümogo. Election ya yimten nung inyakyim ka lir, anungji pa mapang nung pasasa arutsü. Ajisüaka, election-election dang pongmanga tiyazü jembia mesenzüi asenok nisung shiai pei mapa nung temulung agüja inyaktsüla. Aji oda, pei mapa nung nendaka aser ochishia inyakba agi pei lima takar kümdaktsütsüla. Iba jagi dang asen lima nung tiyazü jembiba sobaliba ya anentsü. Tangbo asenok ajak ya menja aponger atsükshishir amato dang kümogo, kechiyong kati ka tiyazü jembibaji ateta angur. Aji oda, joko asenok rongnung tiyazü agi tiyazü akoktsü memerangli aser metetsümonga tiyazü jembiba sülen manidakli aser tiyazü jembirtem majungkettsüli. Joko, tiyazü lima nungi ochi limai lanurtemi anir apusotsü mapang tongogo.