Tiyazü nangzükertem dak tamang makatsüla: Congress Tir Rahul

Bellary (Karnataka), Tsüklai 10 (Agencies): Congress Tir, Rahul Gandhi-i anogo pezünü atema Karnataka semdanga lir, aser mezüng anogo nung pai, Narendra Modi-i aniba sorkari tiyazü aika nangzüker, ta aitsü.
Karnataka kübok Bellary nung lokti senden ka nung jembidang Rahul-i, “Yazü aika nangzükertem aser nenok dang tiyazü nükjidong sayurtem dak nenoki tamang makatsüla,” ta ashi.
Modi’er sorkar amai masü, saka Congress-ibo nangzükba ama inyaker, ta shia Rahul-i, “Narendra Modi-i jembiba nungji tagitsü mali. Pai nangzükba ama pai kodanga meinyaker,” ta ashi.
Tawa Parliament nung Narendra Modi-i jembiba onük dak sendakba nung Rahul-i, Ato kilonser Modi-i tarutsü atema mesüra linük terenlok atema mejembi saka Congress dang aija jembi, ta ashi.
“Narendra Modi-i Parliament nung ghonda ka agia onük jembidang pai tarutsü atema mejembi, mesüra lanurtem nem mapa agutsütsü atema mejembi, mesüra aluyimertem atema mejembi. Pai ghonda ka agia Congress party aser tesüiba mapatem indang ang jembi. Linük nüburtemi Ato kilonseri tarutsü atema jembiba anganer,” ta Congress tongti lenirisa metetdaktsü.
Election agitsü aliba state, Karnataka anogo pezünü semdangba mapang nung Rahul-i lokti senden balala ajanga nüburtem den jembitsü.
Pai Koppal jila nung Huligamma temple semdangtsü aser Gavi Siddheswara Lingayat Mutt nung tongti putir ajurutsü.
Tanabuba anogo nung pai Kushtagi, Kankagiri aser Gangavati semdangtsü aser Karatagi, Koppal nung lokti senden ka nung jembitsü. Yanü pai Raichur, Yadgir aser Kalaburgi districts semdangtsü aser tatemsa pai Kalaburgi nung shishilembartem den jembiba sülen Basavakalyan-i oa Bidar district nung Anubhava Mantapa semdangtsü.