Tiyazü raraba ken o nung Manipur CM-i pa menden toktsütsüla: BJP

Imphal, January 31 (Agencies): 2009 küm Imphal nung tiyazü katepba ken o nung tawa police kati pai taoba mapang telungpur Sanjit kahset, ta jembiba sülen Deobarnü state BJP-i Manipur Chief Minister Okram Ibobi Singh-i pa menden toktsütsüla, ta takhangba agütsüogo.
Yangi osangbenertem senden ka nung jembidang BJP Manipur unit tongti, Thounaojam Chaoba-i, “Sorkar tashi nung alitsü atema tangbo Ibobi Singh temeten mali. Pai official record tiyazü küma memelenshitettsü, kechiyong iba ken o nung osangtemji Supreme Court densema okadak aika nung lir,” ta ashi.
2009 küm Ibobi Singh state Home minister inyakba mapang July 23 nü Imphal nung aliba mozü dokan ka nung People’s Liberation Army telungpur südi ta mulung melemi alir ka tenüng agi Sanjit Meitei (22) kahset.
Iba ken o nung taküm January 25 nü Manipur Police head constable, Thounaojam Herojit-i, par ketdangser additional superintendent of police (Imphal West) Akoijam Jhalajhit teteyuba nung pai prangpong mebeni alisang Sanjit kahset, ta ashi.
Ajisüaka Jhalajhit-ibo Herojit-i jembiba oji tiyazü aser tajemdakdak maka, ta shiogo.
Iba mapang nungji police-ibo kahtepdang Sanjit kahset ta ashi. Iba tatalokba nung tetsür ka tenüng agi Rabina-a lar jabaso den kinungbu ajurui aoba mapang kanga mejungi yiru.
Chaoba-i, BJP tangatetbaji- state nung Congress sorkar tekolakji Chief Minister Ibobi Singh lir, anungji tang pa menden ungi alutsüla, ta ashi.
Paisa, “Akoijam Jhalajhit ji mapa nungi anentsütsüla, kechiyong head constable (Herojit)-i Sanjit kahsettsü tetuyubaji pa additional police superintendent inyakba mapang pai agütsü ta shiogo,” ta ashi.
Party-isa taoba DGP Yumnam Joykumar indanga bushisüngdangdar, kechiyong kahtepba tatalokba nung pa tenüng-a tetshia lir, ta Chaoba-i ashi.
BJP-i Congress Tir Sonia Gandhi dang Ibobi Singh agientsü mepishitsü aser lai ibaji meinyakra onoki lungkak aittsü, ta ashi.
Iba ken o ya tangbo linük ken o ka kümogo, ajisüaka chief minister mesüra Congress-i iba ken o nung kecha mejembir, ta pai ashi.