Tizit battalion-i NSCN telungpur pezü apu

Dimapur, Metsüremi 29 (TYO): Aboi jila temeket nung NSCN pur senzüsenpongba osang tejangja ka angazükba sülen Metsüremi (March) 28, 2018 nü HQ IGAR (North) kübok Tizit Battalion puri police den külemi mita ao, ta Assam Rifles sangdong ka nung metetdaktsü.
Tizit Battalion nungi sepaitemi Aboi Chenmoho junction nung mobile check post ka amenoker garitem mita reprangba mapang nung temulung melemi Maruti Omni van (gari No AS-223847) ka bushisüngdangdang NSCN pur pezü tashi prangpong aser injang bener apu. Sepaitemi apurtem ya Mon district kübok Chenwentnyu nung alir arishi küm 37 SS Sgt Wangnao Takhe @ Wangyah (No – 19729), Mon district kübok Longching nung alir arishi küm 30 tain SS Corporal Khaopa Konyak, Mon district kübok Chinglong nung alir arishi küm 43 tain Hongshai Konyak, aser Mon district kübok Chinglong nung alir arishi küm 30 tain Achae Konyak nunger lir ta jangjaogo.
Sepaitemi parnok ket nungi Regn No 34217 (Made in Italy) keter aliba 7.65 mm Pistol ka, Pt 22 Pistol ka, 7.65mm injang tenet, pt 22 injang pongu, India sen 4,52,940, Mobile phones, MC Dowell Rum bottle pezü, Kani Strips (Opium) asem, SS Sgt Wangnao Takhe tenüng nung Metsüremi (March) 4 nü camp nungi prangpong issue asüba slip ka aser sen akhangba shidi ka ta bener lia ngutetogo, ta sangdong nung shia lir. Parnok pezü den külemi parnok ket nungi apuba osettem Aboi PS nung maneni bushisüngdangtsü atema bendanga agütsüogo.