TK Skills-i “Project 125” lapokogo

Mokokchung, Dec. 10 (TYO): Mokokchung kümer küm 125 ajungba benjungmung nüngtem nung jila nung aliba TK Skills-i Urban Development Officer of Mokokchung, Imtilepden Pongen tongti tesemdanger ka ama jaoka “Project 125” lapokogo, ta sangdong ka ajanga metetdaktsü.
TK Skills-i ‘Project 125’ den külemi ‘Digital India’ kübok ‘web skill training’ sentonga ka lapokogo.
TK Skills nung Managing Director Wapang Aier-i, “Tan lapokba project ajanga tejangrar nisung 125 nem angati training agütsütsü. Tang iba firm nung computer indang software aser hardware den English oshi jembitsü, fashion designing, teka mapa balala aser kidang temang anepaluyim tsütsü training agütsür. Ano Digital India sentong kübok tanü lapokba ‘web skill training’ sentong ajanga TK Skills-i US online cloud software dak ajemdaker ‘Webydo’ dena ‘code-free web designing course agütsütsü,” ta ashi.
Project lapoktsüba mapang, tongti tesemdanger, Imtilepden Pongen-i, TK Skills-i kanga nendaka aser bendanga agüja inyakba asoshi tenüngsang agütsür aser parnok ajanga Mokokchung district dang masü saka danga district tema ajangzüktsü teimla tulu lir, ta ashi.
Pai, Project 125 tenzükba atema tenüngsanga ashidang, nisung 125 nem angati training agütsüba atema Tsüngremi TK Skills tali moajang, ta ashi.
TK Skills ketdangsertemi ashiba agi, Project 125 atema tang nungi tenüng züluaokba maparem tenzüktsü aser tamapur tama agitsü.
Digital India sentong ya Project 125 den balala lir.
Iba sentong ya TK Skills nung Managing Director, Wapang Aier-i ketdangsüa liasü.