TLP tekolakba apuba sülen Lahor nung mangatettep adok

Lahor, Yimpoksüi/November 24 (Agencies): Khrista yimsü dak amanger tetsür ka blasphemy ken o nung maitsüi chiokba dak sendakba nung tamangba yimsü lenir ka apuba ajanga mepelai longkaka aitertem police den mangatettep adokba sülen parnok aika puogo. Parnoki iba dak sendakba nung linük ajunga nung longkak aitba sentong asemben tashi ayonga kaogo.
Muslim lenir Khadim Hussain Rizvi’er Tehreek-e-Labbaik (TLP) party züngsemtemi iba ita tetenzüklen blasphemy ken o Aasia Bibi maitsüi chiokba sülen, linük ajunga asemben tashi mokdanga yuogo. Aasia Bibi ya tasüba agi merenshitsü asoshi küm ti tashi aija arur chiokogo.
Rogonü aonung tamangba yimsü tsütsü lenir ya apuba sülen Lahore nung Rizvi pusemertem aser police tsüngda mangatettep adokba nung nisung pongu tashi yiruogo.
Punjab chief minister office nungi otongdar kati ashiba agi, Rizvi den yariteper Afzal Qadri dena pua lir.
“Afzal Qadri aser Khadim Rizvi na jail-i yokogo. Qadri jail hospital nung yua lir. TLP activists tem aputsü asoshi tang Punjab ajunga nung inyaktepdar,” ta Shahbaz Gill-i ashi.
Information Minister Fawwad Chaudhry-i Twitter ajanga shiba agi, Amungnü maneni longkak aittsü asoshi sentong yanglur aliba athitsü asoshi memulungba sülen Rizvi pua lir.
“Iba jenjang ya nüburtem taküm, osettsüt aser inyakyim kümzüka ayutsü asoshi agi,” ta paisa ashi.
Reuters-i yokba police document nung Rizvi’er telok nungi lenir 10 tashi pua aliba sayuogo.
TLP puri Bibi, yimjak nung tepsettsü asoshi akhanger, aser kasa mapang nung kasa ken o dak sendakba nung Afzal Qadri-i sorkar atsüngdoktsü meranger.
Maneni TLP lenirtemi Aasia Bibi nem nüjiso agütsüba Supreme Court judge tem amokmerenogo aser parnok kilirtem dang parnok tepsettsü mepeshiogo.
Ita tetenzüklen longkak aitba ya sorkari Bibi dak sendakba nung Supreme Court telemtetba asadangshitsü mulungtetba sülen anena liasü.
Bibi chiokba sülen lar kibong ajunga atsüka lir. Par kibongi parnok jenoktsü asoshi teyari meshiogo aser Canada, Spain aser France nunger densema linük aikati parnok jenokdaktsütsü asoshi jaokogo.