TMC lenir den party nung inyaker 400 BJP nung aden

Agartala, March 24 (Agencies): Tanü Tripura nung Trinamool Congress (TMC) state committee züngsem 65 nungi parnok 16 densema party züngsem 400 BJP nung denogo.
BJP nung adener rongnung taoba mapang Tripura unit Trinamool Congress Mendenbuba, Ratan Chakraborty-a densema lir.
Tripura unit BJP Tir, Biplab Deb aser Union minister of state for Railways, Rajen Gohain nati Chakraborty nem BJP wako agüja liasü.
Osangbenertem senden nung jembidang Chakraborty-i, “Tesülen atsüngzüka aliba Northeast tesem terenlok atema nendaka inyakba linük nung yimtenren party ji BJP kija lir. 2018 küm election nung CPI-M sorkar atsüngdoker sorkar akumba ajanga state talenba nungi salatsü ta ni BJP dak tamang akar, koba ajanga nüburtem nem anisüngzük agutsütsü,” ta ashi.
Chakraborty-isa, BJP tali tashi itshitsü atema pai TMC nung inyakertem ano tali ayongdentsü, ta ashi.
Ano BJP nung adener aser TMC state committee nung züngsem alisang, Nitai Chowdhuri-ia, züngsem 65 aliba state committee nungi züngsem 16 BJP nung denogo, ta metetdaktsü.
Gohain-isa, “2018 küm Tripura state elections nung BJP-i majority angutsü aser BJP tsüsem nung sorkar tashi nung aliba CPI ponger oadoktsü,” ta ashi.