TN Chief Minister EK Palaniswami-i ‘trust vote’ takok angu

Chennai, February 18 (Agencies) : Honibarnü Tamil Nadu Chief Minister, Edappadi K. Palaniswami-i 122-11 telemsa nung ‘vote of confidence’ takok nguogo.
Tanep state assembly nung kanga rongrongtep aser MLA temi ozüng alema mapa inyak. Tensa mejungi akümba agi Speaker P Dhanapal-i opposition tongti- DMK purtem senden nungi aotsü atema tetuyuba agütsütsüsa aküm.
Iba sülen ‘vote of confidence’ agidang AIADMK MLA 122-i Palaniswami pusema vote agütsü aser MLA 11-i O Panneerselvam pusema nungit.
Tanep opposition temi Speaker Dhanapal dang ‘secret vote’ inyakyim nung vote agütsüteptsü takhangba agütsü saka ibaji pai magizük.
Iba mapang, DMK züngsemtemi Dhanapal meketbanger lungkak ait aser MLA katibo Speaker indang microphone agientsü merang. Opposition MLA temi tejashi nung menden raksatsü aser shiditem shisa aser Speaker amenlen merepdoka lungkak ait. Iba jagi senden magii anena ata.
Nikongdang 3:00 ako nung tanaben senden amentsü adenshiba sülen Speaker Dhanapal-i Panneerselvam, Congress Legislature Party lennir K R Ramasamy aser IUML züngsem Abubacker nunger nem o tatsütsü jembitsü mapang agütsü aser iba sülen block-wise telemsa nung teka metonga vote agütsütepba mapangji agia liasü.
Iba mapang MLA 122-i Palaniswami nem aser 11-i Panneerselvam nem vote agütsü. Iba mapang DMK züngsemtembo ka danga maliasü aser DMK den yaritepertem aser Congress züngsemtem voting nung shilem magii kimai alu.