TN nung nisung 269 süogo; Modi-i sen cr 1000 lemzüktsü

Chennai/Arakkonam, December 03 (Agencies): Tamil Nadu nung tesüiba küm 100 tsüngda tang tzünglu timtiba arua tzü metsüngba ajanga nisung 269 tashi süogo aser tanü tashi nisung million aika timtemtepdar.
Army, Navy aser Air Force sepaitemi tanen makai Chennai nung timtem agi kongshiba nüburtem kümzükba den külemi teyari maparen balala inyakdar.
Brihostibar anepdang tzünglu aruba ajema akum, saka taruba anogo ana-asem ano maneni tzünglu arutsü takzüteta lir.
Tamil Nadu nung tesüiba küm noklang ka tsüngda tang tzünglu tesashitiba aruba ajanga gari lenmang, train lenmang aser airport nung tzü metsünga ainlen senzürtemi timtem ajurur, iba den külemi nisung aika talitak makai kümogo.
Lok Sabha senden nung Union Home Minister, Rajnath Singh-i, Chennai aser Tamil Nadu nung tzünglu ajanga kongshiba district temji lendong tensa ka nung lir, aser tajemba agi nisung 269 süogo, aser Chennai yimti ya asetkong ka kümogo, ta metetdaktsü.
State nung tzümetsüng tensa reprangdangtsü atema tanü Ato kilonser Narendra Modi tayimtsü ajanga Tamil Nadu-i arua liasü, aser pai chief minister J.Jayalalithaa aser Angh, K Rosaiah na ajurua senden amenba sülen state nem senotsü teyari crore 1000 agütsütsü sangdongogo.
Osangbenertem den jembidang Modi-i, “Tamil Nadu nung tzünglu sashia aruba ajanga teraksatsüba aser tejashi ya ni nguogo. Iba ama teyari nüngdakba mapang ka nung India sorkar Tamil Nadu nüburtem den lir,” ta ashi.
Meteorological Department-i, taruba hopta tepiyong Tamil Nadu tesem aika nung tzünglu arutsü ta metetdaktsüogo.