TN nung sen crore 570 apubaji melung malemba sen lir

New Delhi, May 14 (Agencies): Honibarnü Election Commission (EC)-i, state assembly election agitsü anogo ana dang lia Tamil Nadu nung truck asem nungi sen crore 570 apubaji “Mezüng bushisüngdangba ajanga mulung malemba sen lir” lir ta bushitetogo, kechiyong agency mesüra tentet shingaia iba sen atema maru, ta metetdaktsü.
Income Tax Department densema agency ajak dang junga bushisüngdangtsü shiogo, ta Election Commission ketdangser kati ashi.
“Mezüng bushisüngdangba ajanga, iba ya mulung malemba sen lir, kechiyong iba sen atema agency mesüra tentet shinga maru,” ta ketdangseri ashi.
Tanü Tamil Nadu, Tirupur district nung gari mita reprangba mapang Election ketdangsertemi truck asem nungi sen crore 570 shi apu, aser gari nung mena alirtem jagi iba senji bank tsüngda sen transfer atema lir, ta ashi.
Ketdangsertemi ashiba agi, truck nung meina aoer sepaitemi parnok dang, sen crore 570 ji Coimbatore nung aliba State Bank of India (SBI) nungi Vishakhapatnam nung aliba branch temi belener ta ashi, ajisüaka parnok ket nung nüngdakba tezülubatem maliasü.
Tanep yakta Perumanallur-Kunnathur bypass nung election department indang flying squad aser paramilitary sepaitemi gari mita reprangdang senji apu.
May 16 nü Tamil Nadu assembly election agitsü.