TN nung tzünglu ajanga asür 120 jungogo

Chennai, November 20 (Agencies): Tamil Nadu nung tzünglu aser tzümetsüng dak sentakba lendong balala ajanga asür nisung 120 jungogo aser yasüng tzünglu sashia arua Chennai yimti tesem aika tzü agi metsüngbangba ajanga nüburtem aoksatepogo.

Sangdong ka ajanga Chief Minister, J Jayalalithaa-i, tesüiba anogo pezü tsüngda nisung teku süogo, aser asürtemji timbaka Chennai aser Kancheepuram district na nungi lir ta shia asür kibongtem den asüko osang lemsatepogo.

Asürtem kibong shia sen lakh pezü teyari agütsütsü ta lai sangdongogo.

Regional Weather office ajanga taruba ghonda 24 maneni tzüyimkümlen aser state tiyongtsülen aliba district tem nung tzünglu arutsü, ta sangdongogo.

Western Ghats nung Theni aser Nilgiris na nunga tzünglu arutsü akok, ta Regional Meterological Department Director, S R Ramanan-i osangbenertem dang ashi.