TN nung Vardah yipru ajanga nisung 4 asü

Chennai, Dec. 12 (Agencies): Hombarnü Vardah yipru agi Chennai atongba sülen iba yimti aser Tamil Nadu anüdoklentip tzüyimküm anasa aliba district tem nung tzünglu den yipru mopung tesashi ajanga nisung pezü süogo.
Ano Andhra Pradesh kübok Kakinada tsütsü aliba tzüyim nung angopur ana samaba sülen Coast Guard-i rong amshia tebushidak lir, ta osang angazüker.
Iba yipru ajangasa süngdong noklang aika tera nungi atsüteta laodaktsü.
“Vardah yipru mopung ali tongogo,” ta India Meteorological Department (IMD)-i metetdaktsü.
Additional Director General (Services), IMD, M Mohapatra-i ashiba agi, iba yipru telongtetji Chennai nung kilometer 20 lir, ta ashi.
“Chennai anasa mopungji ghonda nung kilometer 90-100 tekara lir. Tzünglu sashia arutsü aser yipru sashia aittsü imlar. Nikongdang 2:00 ako nung yiru jagi tzükum atong. Iba yipru ya nikongdang 2:00-5:00 ako tsüngda süitsü,” ta Mohapatra-i ashi.
Lendong mataloktsü atema item tesem aika nung power supply anenja liasü.
Iba den külemi ali nemzüka alidak alirtem Chennai nungi, Tiruvallur district kübok Pazhaverkadu nungi aser Kanchipuram district kübok Mamallapuram nung aliba yimtsüngtem nungi nisung 8000 shi aienshidakja tejenokdak semtu 95 nung jenokdatsü, ta ketdangsertemi ashi.
Ano tayimtsü senzüba-a nikongdang 5:00 ako tashi thinenja liasü.
December 14 nü ‘Vardah’ yipru agi Goa kongshitsü
Panaji, Dec. 12 (Agencies): Bodhbarnü (Dec. 14) ‘Vardah’ yipru mopung agi south Goa süitsü, koba ajanga temperature timba akumba den Mongolbarnü nungi state nung tzünglu arutsü, ta tanü ketdangser kati metetdaktsü.
Goa nung aliba India Meteorological Department indang observatory nung Director, ML Sahu-i osangbenertem dang, “Tanü Tamil Nadu kongshiba yipruji asüng (Mongolbar) Karnataka atongtsü,” ta metetdaktsü.
Paisa, “Iba yipru jagi December 14 nü south Goa süitsü, koba ajanga state nung temperature timba akumtsü aser asüng nungi tenzüka anogo ananü tzünglu arutsü,” ta metetdaktsü.
Hombarnü Chennai aser Tamil Nadu tzüyimkümlen tzünglu tesashi den yipru “Vardah” ajanga nisung pezü süogo; iba yipru ajangasa süngdong noklang aika tera nungi atsüteta laodaktsüogo.