TN tzümetsüng agi kongshirtem yaritsü ‘Rock & Roll’ kenten sentong akatsü

Chennai, February 19, 2016 : Chennai yimti aser Tamil Nadu district balala nung tawa tzümetsüng agi kongshir timtema alirtem nem teyari agütsütsü asoshi yimti nung nüngtugu actor Siddharth-a densema ‘Rock n Roll’ kenten sentong ka ayongtsü. Iba sentong ya tzümetsüng ajanga takoksa ngur alirtem asoshi temulunger tenla saruba sentong ka lir aser Pizza brand, ‘Papa Johns’ den lokteper inyakerba lir. Iba sentong nung music dena timtemertem tsütsü teka songtoka teyari agütsütsü.
Tanü, Hokolbarnü osangbenertem den jembiba mapang Papa John’s nung CEO, Joseph-i, “Iba sentong ajanga Chennai telungtet nung aliba Papa John’s outlet ajunga nung senpong ka ka yutsür March 26 tashi tenla sarutsü,” ta ashi.
Iba tenla sarudenba sentong ya Rock n Roll kenten sentong den külemi Music Academy nung agitsü aser taruba sen ajak tangutsü tim nisungtem nem lemtsütsü.
“Papa John’s-i takok tashi teti lokti nem meyipa agütsür. Tzümetsüng ajanga tesama tulu bentsür aruba ajanga temulung kanga raksaogo,” ta pai ashi.
Actor Siddharth-i iba tatalokba atema kanga aria bilemer aser pai, “Chennai nung atalokba ya kanga tejashitsüka lir. Ibai ni aliba tesem aser teyari agütsütsüji kü mapa lir. Ni iba tatalokba kanga jangja nguogo aser iba dak sentakba nung ano teinyaktsü wadang tulu lir,” ta ashi.
Rock n Roll kenten sentong nung shilem agirtemji kentener tejen Usha Uthup aser Anil Srinivasan nungera densema lir, ta pai ashi.
“Iba kenten sentong agiba nikongdang nüburtem ken ajanga jangratemdaktsüba den külemi lendong agi kongshir alir timtemer nem sen agütsüba ajanga tepela aser temoatsü tulu angutsü,” ta Joseph-i ashi.