TN tzümetsüng ya linük lendong: Jayalalithaa

Chennai, Dec 10 (Agencies): Tawa Tamil Nadu nung tzümetsüng lendong atalokba ya lendong tulu, ta Centre-i sangdongogo, ta Brihostibar nü Tamil Nadu Chief minister, J Jayalalithaa-i metetdaktsü.
MP tem dang state tanaben asüngsashiba maparen aser teyari maparen atema Members of Parliament Local Area Development Scheme (MPLADS) nungi sen crore 1 tashi agütsütettsü ta metetdaktsüogo, ta laisa ashi.
“Ni mepishiba langzüa Central sorkari, tzümetsüng ajanga raksatsüba ya lendong tulu ta sangdongogo,” ta lai sangdong ka ajanga ashi.
Laisa ashiba agi, lai lar party MP tem dang iba atema MPLADS nungi sen crore 1 agüjang ta tuyuogo. Lok Sabha nung lar party, AIADMK MP 37 aser Rajya Sabha nung MP 14 lir.
Taoba hopta lai PM, Narendra Modi dang, state tzümetsüng lendong ya ‘Linük Lendong’ ta sangdongang ta mepishia liasü.