TNYF ajanga Hornbill TV anema FIR benok

Dimapur, Chiteni/July 02 (TYO): Hornbill TV Dimapur ajanga osang ka prokshiba dak sendakba nung Tzürangkong Naga Youth Front (TNYF) ajanga Longtho Police Station, Mokokchung nung FIR ka benoka liasü.
Nagajanka (Mariani), Assam nungi Hornbill TV indang osangbener Dip Saikia-i tawa Vikuto nung arrtsü dak sendakba tatalokba indang osang abenba mapang, Assam Police aser Forest ketdangsürtemi tang camp mesema aliba ya Assam indang litsü nung lir, ta ashi. Iba osang ya Hornbill TV ajanga June 29, 2021 nü sangdonga liasü, ta TNYF ajanga FIR nung shia lir.
Komaser osangbener (news reporter) kati Assam-Nagaland arrtsü ladangtsütsü tashi angu, ta TNYF mangmanger, kechiaser video nung Assam Police camp yanglua aliba tenem kolak nung kozü lu anguba ya Nagaland nung lir aser Assam sorkari yangluba Border Ali mesüra Border Road nungi talangka pilar lir, ta ashi.
Anungji Hornbill TV ajanga kuli tejangja memeteti iba amala osang sangdongba atema iba channel indang Editor anema FIR benoker aser aibelener nem tapet obendang agütsütsü akhanger, ta TNYF ajanga ashi.