Tobu district jenjang atema CM nem takhangba agütsü

Dimapur, April 30 (TYO): Tobu district atema maneni takhangba agüja Tobu district demand committee leniba nung Tobu tesem nungi nisung 100 dak temai April 29, 2017 anepdang Chief Minister ajurua shidi ka agütsüogo, ta Tobu District Demand Committee Secretary, Shamoh Konyak-i sangdong ka nung metetdaktsü.
Tobu District demand committee-i Chief Minister nem agütsüba shidi nungji, Tobu nung yimsüsübaren tsütsü timtem angateta 1987 küm Nagaland sorkari Tobu Deputy Commissioner atema Wb. I. Alienba Ao lemzüktsü, aser pai Tobu sub-division nungi Tobu district akumtsü atema benokbaji tang tashi mataloktsüi arur, ta shia lir.
Shidi nungjisa, Chairman, R. Kevichusa (IAS Rtd) leniba nung district administrative re-organization committee 2016-i Nagaland sorkar nem Tobu sub division nungi district jenjang agütsütsü atema takhangba agütsü, ajisüaka sorkari iba atemaji tang tashi inyaka mali, ta shia lir.
“Tobu district akhangba ya nüburtemi ochi obendang aginüa ola adokba ka lir, kechiyong küm aika iba tesem sendoka yutsüogo aser Tobu tesem kübok yimtsüngtemji Mon headquarters nungi kilometer 190 dak tali pilaa lir. Anungji iba takhangba ya yimsüsübaren nung tashi aittsü atema chichia akhangba ka lir,” ta shidi nungjisa metetdaktsü.
Honibarnep banquet hall nung senden tatsüka amendang district demand committee co-convenor, S. P Pongba-i chief minister dang nüburtemi timtem balala ajangshiba metetdakja Tobu district jenjang angutsüji nüngdak, ta metetdaktsü.
Ano taoba MLA aser Tobu district demand committee convenor, A. Nyamnyei-ia, Tobu aser Moka nüburtemji NPF party ajang-ajanga nungitertem liasü, anungji NPF-i aniba tang aliba DAN sorkari nüburtemi Tobu district atema akhangbaji ataloktsütsü ta ni amanger, ta ashi.