Tohanba-i 17 buba NSF Martyrs’ Memorial Trophy asayamong lapoktsü

Nagaland Parliamentary Secretary, R Tohanba; Nagaland Minister, Dr Neikiesalie Nicky Kire; Nagaland Parliamentary Secretary, Toyang Changkong Chang; ASU ketdangsertem aser asayamong tetenzükba asaya nung shilem agir asayartemi aroki agiba noksa ka yangi angur. (Kohima, September 24)

Kohima, September 24 (TYO): Nagaland Parliamentary Secretary, Municipal Affairs, Economics & Statistics, R Tohanba-i lapoktsüba sülen tanü, Honibar nü nungi tenzüka, 17 buba Naga Students’ Federation (NSF) Martyrs’ Memorial Football Trophy Kohima kübok Kohima Local Ground nung asayatsü tenzükogo.
Angami Students’ Union (ASU)-i ‘Goal for Peace’ omen nung ajemdaker ayongba asayamong ya ita 1 shi asayaba sülen taruba October ita 22 nü tembangtsü sentong lir.
“Saisapongtsü nung takok ngua shilem agiba ajanga asayartemi konang nungsang anguba den külemi, peipok mesütsüsa rongsen tajangzüka jenti angur. Anungji, Naga lanurtemi bendanga agüja saisapongtsü sabang nung shilem agitsü ajungshir,” ta tongti tesemdanger, Tohanba-i metetddaktsü.
“Tsüngsem mesemi tangar den sako jenjang asayar, asür Olympian Dr. T. Ao ama asayar tajung akümtsü alizüng yur asayartemi lokti tentet menentsütsüa kecha meinyaktsü aser pei taküm merükteta alitsü ayongzüker,” ta pai ayongzüka liasü.
“Asayar nisung 1100 dak tema aser asaya repranger nisung meyirijang jenti ita ka shi lungjema tan asayamong nung shilem agiba ajanga asen Naga kin nem telungjem aser yimji yimjung tia bener arutsütsü aser asen tarutsü jenjang tajungba kümdaktsütsüsa aseni mera agitsü imlar,” ta tongti tesemdanger-isa ashi.
Ano külen, tanü asayamong tetenzükba asaya nung Meriema Youth Organisation teloki goal 2-0 agi Dejavu Football Club telok madak takok ngua asayaba osang jangjaogo.
Vizotuolie Lhousi-i asaya mezüngbuba shilem indang injury added time aser Petevizo Kezie-o-i asaya tenzüker minute 54 buba nung par Meriema telok asoshi takokba goal anaji agüja liasü.
Nagaland aser Manipur na nung tentetba asayatsü telok 66 tashi toktepa asayaba sülen champions teloki sen lakh 1.60 senpet aser tanabuba jenjang angur teloki sen lakh 1 senpet den külemi, takok marok aser kulikaketa agizüktsü.
Ano, 2 buba aser 3 buba jenjang angur telok ana nem sen 50,000 aser sen 30,000 senpet agütsütsü renemba den individual shilem nung Player of the Tournament, Best Custodian, Best Defence, Best Mid-fielder aser Highest Scorer jenjang ajangzüker asayartem nema sempet agütsütsü renema lir.