Tohanba-i New market, Dimapur nung lenmang lapoktsü

Dimapur, August 18 (TYO) : Mongulbarnü Municipal Affairs Cell, Economics & Statistics Parliamentary secretary, R Tohanba-i New market, Dimapur nung gari lenmang lapoktsü.
Iba lenmang ya Dimapur Municipal Council ajanga yanglu aser Secretary, Municipal Affairs Cell, Dr Maongwati Aier lia Tohanba-i lapoktsü.
Iba lenmang ya GS road nungi New market tashi lir aser küm aika kanga mejungi liasü. DMC-i iba lenmang nung concrete slab enoka yanglu aser drainage system kanga junga yanglusemogo.
DMC-i toll tax saruba nungi aazükba sen ajanga Dimapur nung gari lenmang trokbuba yangluogo aser ano parnokisa tesem balala nung dustbin 33 tashi yangluogo aser kar teyangludak lir.
Tanü Tohanba-i Dimapur nung alirtem dang maneni department den yaritepa terenlok mapa inyaktsü ayongzük.
Chief minister TR Zeliang-i Urban Development nungi agiteta Municipal Affairs Cell (MAC) ta ser department tasen ka tentetba atema Tohanba-i pa nem tenüngsang agütsü.
State sorkari MAC atema senotsü melemzüktsür saka parnok sasa sen lenmang bushir. Anungji nübortemi MAC den yaritepa terenlok bener arutsü merangang, ta Tohanba-isa metetdaktsü.
Atokhe Ayemi, CEO, DMC-i Dimapur nung terenlok mapa inyakbatem ajak ketdangsüa repranger aser tanü pai o jembidang ashiba agi nisung aika dak civic sense mali.
Public-i yaritepa DMC-i mapa inyaker saka tesem aika nung nisungtemi dustbin nung dang masü saka dustbin adena orra jana mashimashi endoker, ta Atokhe-i ashi.
DMC-i civic sense indang tali meteta lidaktsütsü atema poster campaign ka ayongzüka agitsü aser iba nung dustbin tema nung jana endokba noksatem sayutsü, ta paisa shisem.
Tanü sentong nungsa Secretary, Municipal Affairs Cell, Dr. Maongwati Aier, IAS-i o jembidang DMC nem tenüngsang agütsü.
Paisa tawa tenzükba mapatong “Housing for all 2022” indang osang metetdaktsü.