Dimapur, August 21 (TYO): Yashi (20/08/2019) Thilixu village (Dimapur) nung UT Supervisor cum NSCN (Reformation) Defence Kilonser, Khekato Kinny’er kidang atalokbaji pa atema tia taka, ta tanü GPRN MIP sangdong ka ajanga metetdaktsü.
August 16, 2019 nü Unity Colony, Purana Bazar-B, Dimapur nung Naga Army, Lieut. Col. Toishe Yeptho tepsetba nung Khekato-i shilem agia lir, ta osang ka ajanga lazükba sülen ibaji metetpelatsü atema Col. Khehoto leniba nung NSCN züngsemtem Khekato’er kidangi ao, ta kasa sangdong ajanga metetdaktsü.
“Khekato dak akahtsü atema tetuyuba magütsü. Ajisüaka Khekato-i par züngsemtem dang Col. Khehoto par kidangi matudaktsütsü tuyu, aser tetsübu nung gate sülen nungi injang khaloktsü, anungji ozü züngsemtemia meyiper injang khaloktsü. Injang agi Col. Khehoto tekolak nung apeta süi. Onoki bushisüngdangba mapang nung par züngsem ka apu; shibai Khekato-ia shilem agia lir ta ashi. Khekato tepsettsü sentong maliasü. Onoki pa tepsettsü tebilemba ali asübo pa mejenbutsüsa tanga lenmang ajanga inyaker lila,” ta kasa sangdong nung shia lir.
“Khekato aser par züngsemtemi Lieut. Col. Toishe Yeptho, pa kinüngtsü lia khasetbaji mezüngmeshi mapa lir, kong la daka akha. Anungji nisung tepsetba yimya yagi onokia iba ya inyaktsüsa akümer, aser iba ken o junga metembang tashi onoki inyaktsü,” ta sangdong nung shia lir.
Ajisüaka NSCN-R-i, parnok junga renema lir saka aremzüker, ajisüaka parnok amokmerenra ibaji nokdangtsü atema renema lir, ta sangdong agütsüba ajanga süngmanger, ta sangdong nung shia lir. Tawa Naga nunger 73buba Naga Independence Day monger India-Naga yimtenren ken o latettsü atema yongyaa ataba mapang ka nung kechiba NSCN-R-i Lieut. Col. Toishe Yeptho tepset, ta süngmanger, ta sangdong nung shia lir.
“Onoki Khekato ji mechioktsü saka Lieut. Col. Toishe Yeptho tepsetba atema ken o junga akatsü. Joko mapang tatsüka NSCN-R-i timtem agüja arudar. Ajisüaka onoki aremzüka yutsür. Joko onok dang nungi maongka magitsü atema tang nungibo onoki ozü tangatetba melenshitsü,” ta sangdong nung shia lir.
“NSCN-R-i official süa nisung tepseter Khekato pusemra ken oji balaka akümtsü. Ibajibo NSCN-R-i Lieut. Col. Toishe Yeptho tepset ama züngshitsü,” ta GPRN MIP sangdong ajangasa metetdaktsü.
You must be logged in to post a comment Login