Tokyo nung küm 4 sülen rüjep sashia alar

Tokyo, Jan 22 (Agencies) : Japan yimtiba Tokyo nung küm pezü sülen tang rüjep kanga sashia alar anungji nüburtem memunudangsa ki tongseptsüla kechiaser gari ajanga olioraba nung timtem ataloktsü, ta tanü Hombarnü Japan weather agency ajanga tekümdangtsü osang ka metetdaktsüogo.
Rüjep alaba ajanga linük telongzük nung Tokyo yimtiba nungi apusoa aoba aser kasa yimti bushia arutsü aliba tayimtsütem aika thinena ayu; ano train-a kar mejajadaktsüi shibanga liasü.
Japan northern region nung mapang shia rüjep sashia alar saka Tokyo yimti nungbo yamaji aiben mataloker.
Maneni rüjepji tesashiba alatsü amai tensa jagi sayur asünung, nüburtem dang akhi ama mesüi mapa inyakba mapangji tatsüba küma yanglushiang, ta agency’ nung chief forecaster, Tsumoru Matsumoto-i ajungshia metetdaktsüogo.