Tokyo Paralympics: Bhavina & Nishad nati silver aser Vinod-i bronze medal angu

Luroi/August 29, 2021 (Agencies): India tsürtem rongnungi table tennis asayar Bhavinaben Patel-i Paralympic Games nung silver medal ngua otsü tasen ka yangluogo. Paralympic nung mezüngbuba asayaba mapang lai iba takok ngutetogo. Deobarnü tetsür kija final asaya nung la China tsür Ying Zhou 0-3 agi koka liasü.

Arishi küm 34 tain asayari asayamung tepeyong kanga junga asayaba sülen final nung 7-11 5-11 6-11 agi Zhou-i la tsükdaktsü, shibai gold medal anaben tashi koker lir.

Hopta tetenzükdang group stage asayaba mapang Zhou-isa Patel koker liasü.

Paralympic nung medal pongu tashi ngur aliba asayar den final asaya nung Patel-i la tasa shidak benoka masayateti liasü.

Patel, shiba ita 12 asüdang polio tashidak agi menepa liasü, lai Honibarnü semifinal asaya nung 7-11 11-7 11-4 9-11 11-8 agi China tsür world no 3 asayar Miao Zhang tsükdaktsü.

Hokolbarnü quarterfinal nung lai 2016 Rio Paralympics gold medallist aser world number two asayar Serbia tsür Borislava Peric Rankovic koka medal kabosa angutsü jangjar liasü.

Kasa mapang nung Deobarnüsa tebur high jump T47 asaya nung India nunger asayar Nishad Kumar-i silver medal nguogo. Paisa, iba asaya nung Asian record yanglua liasü.

Kumar-i 2.06m alemteta silver medal angu aser Asian record tasen ka yanglu. Iba asaya nung America nunger asayar Dallas Wise nema silver medal agütsü, kechiyong Kumar tenapronglai 2.06m alemteta liasü.

Kasa mapang nung America nungersa Roderick Townsend-i 2.15m alemteta gold medal anguba den world record tasen ka yangluogo.

Maneni Vinod Kumar-i tebur discus throw F52 event nung bronze medal ka nguogo aser pai Asian record tasen ka yangluogo.

Vinod Kumar ya arishi küm 30 sülenang asaya tenzük aser pai tang arishi küm 42buba nung Paralympics medal ka koktetogo.

Pai discus throw final nung discus 19.81m merepteta bronze medal ngua liasü.