Tom Cruise’er film yangludak tayimtsü tsükok; 2 asü

Medellin, September 12 (Agencies): Hollywood actor, Tom Cruise-i tan tesüsa tongti shilem agiba film, Mena tangoka yangludak, Colombia kübok Milargos jila nung tayimtsü ka tan September ita 11 nü tsükoka lendong atalokba osang ka Colombia Civil Aviation Authority (CAA)-i tanü Honibar nü metetdaktsüogo.
Tan atalokba lendong nung tayimtsü anishisang, Alan D Purwin densema nisung 2 tsükset aser nisung 1 yiru,” ta Helinet Aviation nung Executive aser tan tsükokba tayimtsü kibur, Jack Snyder-i osang jangjashitsü.
Universal teloki yangluba film tasenba, Mena tangokba maparen iba anogo asoshi tembangba mapang nung tayimtsüji tsükok ta CNN osangia metetdaktsüogo.
“Asür Purwin-i aniba twin engine propeller tayimtsüi Medellin yimti bushia aodang tayimtsüji Antioquia region kübok San Pedro del los Milargos jila nung tsükok,” ta osangi shisem.
Asür Purwin-i 1984 küm Airwolf film yangluba mapang nungi tenzüka pa asünü tashi pai aniba tayimtsü nung noksa agirtem anir Hollywood nung yangluba film aser television sentong balala nung amshitsü asoshi anüng nungi noksa aser video tangokba maparen nung yaritepba osang jangjaogo.
Tayimtsü anishiba den külemi, Purwin-i Jurassic World, Zero Dark Thirty aser Indecent Proposal film nunger nunga shilem agiba osang bushiteta lir.
Universal Pictures telokia tan lendong nung tsükseta asür aser yirur kibongtem den sasaba olen lemsatepba osanga jangjaogo.