Tom Hiddleston-i Kong film nung shilem agiba indang lemsatep

March 11, 2017 (Agencies): ‘Kong: Skull Island’ nung ita 5 tashi iba film yangludang alima nung tobur tajung tesemtem aika sema senzü, koba ajanga parnok melaki kazütsü asoshi maongka aika agütsü. Tom Hiddleston-i parnok sentong balala nung shilem agiba ajanga tali telongjemba akümba indang ashi.
Parnok iba film yangludang – Queensland, Australia; Oahu, Hawaii; aser Northern Vietnam tesemtem sema senzüa liasü. Tom Hiddleston shibai iba film nung James Conrad ama shilem agir, pai iba maogka agia pa den külem mapa inyakertem den tali sendakteptsü asoshi film yangluba dak alak danga sentong aika yanglua shile agia liasü.
“Onok ajak kidang nungi pilar alima kinük balala nung mapa inyakdang, onok kanga dang kara sendaktepa aküm. Hawaii nung onok ‘karaoke’ kentenba nung shilem agiba den külemi Honolulu Waikiki Beach nung ‘surf’ asütsü asoshi hika, onok Go-Karting-ia ao, barbecue-a yanglua achi aser Hanoi nung yimdong nung ayokba chiyongtsütem chia senzü. Iba mapangtem kanga dang jangratemtsüka liasü,” ta Hiddleston-i ashi.
Kidang nungi mapang talangka asoshi pilar alitsüji ajak asoshi tezüdangtsü ka lir, saka iba film nung tesüngmangtsü asetkong ka yanglua sayutsü asoshi alima tesembalala asemtsüji tenüngdaktsü liasü. Iba film nung sepai, aser kechisarena bushidanga senzürtem telok ka, kodanga modangba kotak mesükba asetkong ka nung meima aliba yimyatem aser shiruru ka bushidangtsü asoshi aposur, saka tia maka parnok ‘Kong’ alidak tesemi ia lendong ajuruba otsü ka lir.
Tom taruba film ‘Thor: Ragnarok’ koba nung pai Loki ama maneni shilem agir, iba film November 3 nü sayatsü. Maneni Nick Park indang animation film ‘Early Man’ nung Lord Nooth olaji pa asütsü. iba film nung pa Eddie Redmayne aser Maisie Williams den külemi shilem agitsü.
‘Kong: Skull Island’ iba ita March 10 nü sayaogo.