Tom Petty Accidental Drug Overdose agi asü

London, Aenjeti 20 (Agencies): Nüngtugu kentener Tom Petty ya accidental drug overdose agi asü, ta par kinungertemi metetdaktsü.
Tom Petty and the Heartbreakers kentenba telok nung lead singer ya taoba küm Mongputeni (October) nung arishi küm 66 buba nung asü.
Par kentenba telok Facebook page nung Petty kinungtsü Dana, aser jala Adria nati ashiba agi, pa asüba ya kanga dang tia maka tatalokba ka lir. Pa pain medications balala agi overdose sür asü, ta metetdaktsü.
“Kibong ka ama onoki iba osang ajanga iba tatalokba dak sendakba nung maneni ken o adok yonga aotsü ta angateter aser onoki iba ya ajak ajangzüktsü asoshi olemtepba ka asütsü, ta imlar. Maneni iba osang ajanga taküm karbo kümzüktettsü, ta onoki amanger.
“Onoki pa kecha tashiba melei iba lima nungi pilaa ogo ta jangja meteta lir. Pai jangraba mapa tatembangsa par kentenba telok den parnok sapur matsüngdang shilem agiba sülen iba lima nungi pilaa ogo. Iba sentong ya pa küm 40 dak tema ken tena aruba nung tour tulutiba liasü,” ta par kinungertem sangdong nung shia lir.
BBC sangdong ka ajanga ashiba agi, Los Angeles coroner office ajanga Petty ya mozü ti meyoktepa achiba ajanga “multisystem organ failure” agi asü. Mozütemji fentanyl, oxycodone, emazepam, alprazolam, citalopram, acetyl fentanyl, aser despropionyl fentanyl liasü.