Tom Uzhunnalil nem ‘Mother Teresa Award for Social Justice’ agütsütsü

Chennai, October 6 (Agencies): Yemen nung Islamic kiralongrartemi ita 18 tashi pur ayuba India nunger putir nem Mother Teresa Award for Social Justice agütsütsü.
Father Tom Uzhunnalil ya taoba ita chiok aser Mumbai nung aliba Harmony Foundation-i pa nem ‘Mother Teresa Award for Social Justice’ agütsütsü shimtet.
Harmony Foundation tenzüksang Abraham Mathai-i osangbener dang ashiba agi, Uzhunnalil ya Salesian priest ka lir aser pai Yemen toktsür aotsü maongka ngura ministry maneni inyaktsü mulungtet.
Taküm küm atema omen “Compassion Beyond Borders – a compassionate response to the refugee crisis” atema Uzhunnalil ji kanga dang tapet lir, ta Mathai-isa ashi.
“2015 küm Uzhunnalil-i Yemen toktsür aotsü lenmang angu saka pai kiralongra mapa inyakba tesem toktsür moi humanitarian aid agütsütsü mulungtet” ta paisa shisem.
Islamic kiralongrartemi Aden nung aliba Missionaries of Charities retirement home ka amakdang Uzhunnalil pur ao. March 2016 nung pa idakji chaplain inyaka liasü. Iba lendong nung nisung 16 tepset aser tasürtem rongnung nuns 4 dena liasü. Iba mapa atema Islamic State-i tenüng agia sangdonga liasü.
Pa apurtemi video balala sayuba nung Uzhunnalil dena liasü aser video tem nung pai India sorkar aser Catholic arogo dang pa chioktsü atema mapa inyaktsü mepishia sangoktsü.
December 10, 2017 nü Uzhunnalil nem Mother Teresa indang sempetji agütsütsü.
Mother Teresa Memorial Awards ya 2005 küm nungi agütsütsü tenzük. Alima nung yimjung, putepa aliba aser lokti nung temeden atema inyakertem ajiteta kija mesüra telok nem sempettem agütsür.
Uzhunnalil chioker tananübuba nung pai Pope Francis den ajurutep aser paisa media pur den ajurutepa sensaksem.
“Ni Tsüngrem dang kanga pelar. Ni pua ayurtem danga pelar kechiyong parnoki ni angatet aser kü dak tashiyim mapa meinyak, ta Uzhunnalil-i osangbener den jembidang ashi.
“Tsüngremi ni chioktsü atema teyari agütsüba aser alima ajungalen nungi adianutemi sarasademtsüba ajanga ni chiok. Ozü linük aser tanga linüktem nungi Christians, Muslims, Hindus, aser nisung dang pelar” ta paisa shisem.
Taoba ita tatemlen Uzhunnalil-isa India Prime Minister Narendra Modi aser External Affairs Minister Sushma Swaraj na den ajurutepa liasü.