Tonga oagi angatettepmatsüla !

Tang Nagaland nung Municipal aser town council election agitsüba sentong nung tanga tesem kar nung nomination agütsüteta election agiaka Kohima aser Mokokchung nung magitetra, ibaji state government asoshi takok amai mezüngshitettsü. Ano, balaka tanga tesem ajakji toktsür Nagaland yimtiba Kohima nung municipal election magitetbaji ajak asoshi tebilemdangtsü tuluka asütsü. Iba yimobilem nung tamalena municipal aser town council election agitsü nüngdakba indang züluogo aser tanüa zülur kechiyong election agi nung dang municipal aser town council alidak mepu shia nung ketdangser kakabo shimteta terenlok mapatem achaayangtettsü, anungji election timi agidaktsüner. Aji oda, election agia municipal aser town council tentet nung dang center nungia senotsü bener aruagi terenlok mapa inyaktsü lenmang sadema lapoktettsü. Ajisüaka, tang amai nübortemi memulung tashibo kangshia election agitsübajia nüngdak madoker. Election agiba nükjidongji nübortem nem lenisüba tashi aser khuret agütsür parnoksasa parnok alidak terenlok mapa inyakdaktsüner. Ibaji nübortemi angateta lir. Ajisüaka, tang amai election nokdangba tetezüji municipal ozüng lateta aliba nungji nübortemi maginüba kar alitsü mesüra nübortemi mangatet asütsüa akok. Anungji, itemji government-i angadanga angatetteptsübaji kanga nüngdaker. Kuli kar agi tamalen khen municipal aser town council election agirbo magitet küm aika aruogo, anungji tang yabo jungjunga ajaklen timi agitettsüsa government-i tamasa nübortem nem tangatetba agütsütsüla. Aji oda, küm paikaya election magi arur tang yamai nübortem den tsükchitepa election agiba agi shinga majangzüktsü. Kechisüdir süaka election agitsü asoshi government-i anogoa atsülanger aser nomination agütsütsü tesema belener, ajisüaka iba jagi nübortemi memulungba tesemtem nung municipal aser town council mekümtettsü. Iba ama sentong jagi nübortemang tali jashidaktsütsü. Anungji, nomination agütsütsü anogo atsülangtsü aser tesem melenshitsü melena, election maparen ya khen anena yur government nung alirtemi nübortem bushia oagi jembitsüla. Aiben government nung alir yimsüsürtemi nüngdak mapang nübortem bushia aotsü melen nübortem aru atar. Iba jagi aiben nisung ajak tebilembabo tajung aser shitak lir saka yimsüsür o nübortem na ajurua shisa melemsateptetba ajanga tang amai tebilemtsü ajurur. Atangji, tesem kar nungbo government-i inyakbajiang shitak ser nung nübortemi mangatet asütsüa akok, anungji itemji mangatet tashi ashitsüla. Ano, tesem kar nungbo nübortemi akangbaji government asoshi mapa küma inyaktsütsü tasak asütsüa akok saka government-ji nübortem asoshi alir asünungji nübortemi mulungba inyaktsütsübaji government teinyaktsü rongnung mezüng aser kanga tongtibangtiba mapa asütsüla. Aji oda, tang nübortemi municipal aser town council election magidaktsütsü ta nokdangba mapa ya tangatettep kati arua agitsübaji government asoshi tamakoktsü mapa kabo masü amai bilemer. Anungji, tang amai nübortemi mulungba anema nomination agütsütsü anogo atsülangtsü agibo, 1st February nung agitsüba election sentong ya khen thitema yur, government nung alirtemi nübortem bushia oagi angatetteptsü junger. Iba ama lenchi oagi taginüba angadangba mapa nungji tepela aser takok lir. Iba ama lenchi aoba mapa jagi rongsen aser nübo aika endoka belemtsüba timtem aika nungi kümzüktsü. Aji oda, kati ka timtem aser taginüba tonga oagi angadangba agi azütokshitsüba lendong nungia kümzüker aser tangatettep kati melamelaa arutetter. Tang election magidaktsütsü ta nokdangertem tangatetba nunga kechisüdir süaka election magidaktsütsü ta masü saka taginüba aser tangatetnüba kar alitsü, anungji itemji tonga oagi angadanger külen tangatettep nung telatetba ka agitsübaji menungnangi inyaktsüla. Ibai government nung alirtem asoshi nübortem den küpteptsüba mapang masü saka tsüngdong oagi ajurua jembitsü mapang tajungang ka südaktsütsüla.